O telecentro de Brión informa dunha alta participación da veciñanza para obter a credencial europea de manexo do computador
mércores, 25 de setembro do 2013
- Rodrigo Boado (esquerda) examinouse con éxito do primeiro módulo do ECDL
Dende o telecentro de Brión (pertencente á Rede
CeMIT) informan do
comezo das probas para acadar a credencial do European
Computer Driving Licence (ECDL), traducido ao galego Acreditación
Europea do Manexo do Computador, un certificado internacional que
avala o coñecemento en ferramentas informáticas de uso común de
quen o acada. As ditas probas, engádese dende o telecentro,
“comezaron con forza este ano académico, e así, nun mes escaso de
curso rexistrouse un intenso ritmo de un exame por semana”.
Culpa disto, engádese, téñena en parte as
titorías do venres, proxectadas para que os veciños poidan
recuperar días perdidos de clase e repasar o aprendido ao longo das
xornadas previas. Estas titorías serviron pois para darlle un pulo
importante ao proceso de obtención da dita credencial, xa que unha
boa parte dos exames lévase a cabo no tempo da titoría. “O ultimo
exemplo disto”, sinálase dende o telecentro, “é o de Rodrigo
Boado, que o pasado venres superaba o primeiro módulo do ECDL,
sendo o único en facelo cun 100% de respostas acertadas”. Por
certo que Rodrigo foi un dos técnicos que participou na montaxe do
telecentro brionés hai uns anos, e agora no seu labor docente
precisa da devandita credencial europea no manexo das ferramentas
básicas do computador.