O software libre avanza nas nosas empresas por enriba da media estatal

A programación aberta medra nas empresas galegas e ten pleno sentido que así sexa. Por unha banda, apostar por ferramentas con licenzas abertas permite na maior parte dos casos aforrar custes, sobre todo no pago das devanditas licenzas. Pola outra, o software libre, malia as diferenzas que pode haber entre uns programas e outros, xeralmente dá marxe para a adaptación ás necesidades particulares dunha compañía. Por se isto fose pouco, para atopar servizos de deseño e implantación de software libre corporativo non é preciso ollar para o lonxe: hainos en todos os recantos do noso país.
Estas e outras razóns son as responsables do máis recente achegado polo Observatorio Galego da Sociedade da Información (OGSI) en materia de afianzamento empresarial do código aberto na nosa terra: as firmas galegas superan á media estatal no emprego de Linux.
Máis en detalle, xa hai un 10,1% de empresas nosas de máis de 10 traballadores usando o devandito sistema, fronte ao 8,9% estatal. Isto significa que o medre interanual en Galiza foi do 23,2%. Estas e outras conclusións foron tiradas do estudo dos informes achegados polo INE sobre o uso das novas tecnoloxías e do comercio electrónico a nivel empresarial ao longo do curso 2008/2009. Na escolma de datos feita polo Observatorio tamén se dá conta de que algo máis da metade das firmas galegas con conexión á Rede usa a sinatura dixital, dous puntos por riba da media española.