O satélite galego Humsat-D, en órbita e en activo
venres, 22 de novembro do 2013
Este xoves 21 ás 11.21
horas, a estación de seguimento da Escola de Enxeñaría de
Telecomunicación da Universidade de Vigo recibiu a confirmación de
que o satélite galego Humsat-D, impulsado por investigadores do
campus, estaba
xa en órbita e en activo. Era pois o peche dun ciclo (agora
comeza outro ciclo: o da actividade en si mesma do aparello e a
recollida de datos), o do deseño, desenvolvemento, preparación e
posta en órbita, que levou máis de un ano de traballo e que contou
coa colaboración da Organización das Nacións Unidas e a Axencia
Espacial Europea, figurando en primeira liña, como responsábeis
principais deste importante proxecto galego, os integrantes do
Agrupamento Aeroespacial da Universidade de Vigo. Para quen non o
saiba a estas alturas (e nunca mellor dito), dicirlle que o Humsat
diríxese ao fomento de capacidades no sector espacial, sobre todo en
países emerxentes.
Segundo nos relatan
dende a UVigo retomando o fío dos acontecementos, ás 08.00 horas e
co lanzamento
do foguete Dnepr desde o cosmódromo ruso de Yasni comezaba “unha
nova xornada histórica na carreira aeroespacial da Universidade de
Vigo que a día hoxe conta con dous satélites no espazo, o Xatcobeo
e o propio Humsat-D que, cunha vida útil de dous anos, permitirá
facer unha proba completa do sistema, recollendo datos e verificando
o funcionamento da constelación antes de que os oito satélites que
a completan sexan postos en órbita”. Sinalar que no proxecto que
culminou esta semana, financiando polo Ministerio de Ciencia a través
do Plan Nacional do Espazo, participaron arredor de 150 persoas
durante os últimos meses.
Na comparecencia
pública que se celebrou no Edificio Miralles trala recepción do son
emitido polo Humsat-D, tanto os integrantes do equipo como o reitor
da Universidade de Vigo, Salustiano Mato, insistiron na importancia
de que a institución conte con dous satélites no espazo nun período
de tan só ano e medio. Unha satisfacción que o reitor estendeu á
Organización das Nacións Unidas, sinalando que “a ONU ten que
estar contenta porque ten o seu primeiro satélite, o primeiro
satélite dunha constelación que ten unha misión claramente
humanitaria e isto empeza hoxe aquí”. Mato fixo referencia tamén
á máis que posíbel experiencia comercial que se extrae do
desenvolvemento destes aparellos, nicho de actividade importante para
a nosa terra.
Onte e mañá
Segundo fai saber a
UVigo, a historia aeroespacial da Universidade comezou en febreiro
de 2012 con Xatcobeo (que desde o seu lanzamento ten orbitado máis
de 9.000 veces arredor da Terra durante os preto de 650 días que
leva no espazo) e continuou con Humsat-D, proseguindo a partir de
agora con GENSO, a rede mundial de estacións de seguimento; ESEO e
ESMO orbitadores nos que a Universidade colabora; Femtoxat o pequeno
satélite de 250 gramos que con case total seguridade será lanzado o
vindeiro ano e Ballonxat, proxecto de lanzamento de globos
estratosféricos. Así mesmo, a Universidade de Vigo negocia a súa
participación na constelación xaponesa UNIFORM que incorpora
cámaras para detectar lumes e tamén a temperatura do mar.