O satélite Humsat-D da Universidade de Vigo porase en órbita o vindeiro 21 de novembro
xoves, 7 de novembro do 2013
O satélite vigués
Humsat-D entrará en órbita o 21 de novembro, dende Rusia, cunha previsión de
vida útil de dous anos. Así nolo confirmou esta semana a
Universidade de Vigo, que
informou tamén que se está a ultimar a creación dunha spin-off
aeroespacial propia da institución educativa galega. O
lanzamento do satélite, engadiu a UVigo na presentación previa a
este acontecemento, culmina un proceso de traballo dun ano e abre a
porta a un novo período que resultará crucial para confirmar a
viabilidade do proxecto Humsat (proxecto internacional para o fomento
de capacidades no sector espacial en países emerxentes, neste e
noutros eidos tecnolóxicos). A posta en órbita do Humsat-D levarase
a cabo a través do foguete Dnepr que carrexará en total unha
trintena de satélites, entre os que se atopa o desenvolvido pola
Universidade de Vigo.
“Aloxado no interior
do satélite nodriza Unisat-5”, explicaron os responsábeis deste
desenvolvemento, “a posta en órbita de Humsat-D marcará un novo
fito na historia aeroespacial da institución académica que partindo
o pasado ano dun cubesat educativo como o Xatcobeo, situarase
a partir dese momento no punto de partida do desenvolvemento dun
proxecto de dimensión mundial”. O aparello galego permitirá facer
unha proba completa do proxecto internacional no que se insire,
recollendo datos e verificando o funcionamento da constelación antes
de que os oito satélites que a completan sexan postos en órbita nun
futuro. A validación do proxecto Humsat a partir do lanzamento de
Humsat-D permitirá desenvolver numerosas aplicacións prácticas que
nalgúns casos xa están a ser negociadas entre os responsábeis do
proxecto na Universidade de Vigo e varios países. “Actualmente
estamos nunha fase de negociación moi avanzada en temas de control
de augas e de telemedida” explicou Fernando Aguado (coordinador do
proxecto e profesor da Uvigo), quen salientou que este sistema
permitirá a grandes países “por exemplo redefinir redes de
seguimento profesional das súas instalacións en temas de polución
ou mesmo control de intrusismo”.
Segundo engadiu, os
satélites integrados no proxecto ao pasar por riba dos sensores
recollerán os datos necesarios para prestar un determinado servizo
empregando para iso unha banda de radio UHF, entón descargarán e
porán en Internet esta información a disposición do usuario final.
E engadiron os responsábeis do proxecto vigués: “Ademais de ser
quen de situar no mapa da transmisión de datos aos países en vías
de desenvolvemento, Humsat pon a disposición de calquera entidade,
institución ou mesmo particular a posibilidade de dispoñer da
información que precise, o que evidencia a apertura dun novo
segmento do mercado aeroespacial”.