O robot Nao recibe ao milleiro de estudantes e profesionais que están a participar nas JAI 2014
martes, 4 de novembro do 2014
Tal e como informamos
onte, comezou
finalmente a semana da automatización industrial da man das xornadas
JAI, cinco días para amosar en detalle os máis recentes achados
da enxeñaría, da robótica e das novas tecnoloxías aplicadas ao
ámbito do industrial. Ou sexa, para amosar como a tecnoloxía
permite facelo todo, a nivel empresarial, moito máis doado.
Precisamente
a sexta edición das Xornadas de Automatización Industrial foi
inaugurada por un enxeño destas características, o robot Nao,
un trebello de 60 centímetros de altura que foi o encargado de dar a
benvida aos asistentes no centro AFundación de Vigo. A intervención
de Nao, deseñado pola empresa francesa Aldebaran, precedeu ao acto
oficial de apertura presidido por Salustiano Mato, reitor da
Universidade de Vigo e Abel Caballero, alcalde de Vigo.
A xornada primeira,
como non podía ser doutra maneira, contou tamén coa presenza do
profesor Nacho Armesto, principal responsábel destes encontros, que
falou das JAI como mesturadoras de dous mundos, o profesional
e o académico. Segundo fixo saber, até 500 estudantes e 300
profesionais daranse cita este ano nestas xornadas nas que se
desenvolverán máis dunha trintena de relatorios da man de empresas
como PSA Peugeot Citroën, ABB, Siemens, Schneider, Omron, Rockwell
Automation ou Bosch, así como de centros de tecnolóxicos como
Gradiant ou CTAG e institucións académicas.
Lembrar que o inicio
das JAI 2014 estivo precedida tamén pola visita que os integrantes
da mesa presidencial, xunto co conselleiro de Cultura e Educación,
Xesús Vázquez, realizaron á media ducia de demostracións
instaladas, tanto na entrada, como no segundo andar, do centro social
AFundación. Deste xeito, amais de coñecer de primeira man ao robot
Nao, tiveron a oportunidade de dar conta das potencialidades do
sistema robotizado de asistencia en rehabilitación clínica Fisiorob
desenvolvido polo centro tecnolóxico galego Aimen, das vantaxes do
sistema de balizamento robotizado Robocone da empresa galega Imatia,
así como das implicacións das tecnoloxías de realidade aumentada e
sistema de posicionamento de interiores de Gradiant. Tamén puideron
esculcar na maqueta do futuro estadio de Balaídos realizada, segundo
o deseño dos arquitectos, por Lupeon 3D, unha empresa creada por un
grupo de ex alumnos da Universidade de Vigo, “que empeñaron o seu
patrimonio para adquirir máquinas de impresión coas que traballan a
demanda dos clientes que lles solicitan impresións concretas”,
explicou o profesor Nacho Armesto.