O road show tecnolóxico de Microsoft fará a súa vindeira parada en Vigo
venres, 16 de marzo do 2012
- Asistentes á xornada celebrada en Santander
A iniciativa de
Microsoft Impulsando PEME, que a
firma está a levar por toda a xeografía española para dar a coñecer entre o
empresariado as solucións tecnolóxicas que lles ofrece para mellorar a produtividade
dos seus negocios, vai facer a súa vindeira parada en Vigo, onde citou ás
empresas de toda a Comunidade.
A cita tecnolóxica terá lugar o vindeiro 20 de marzo no Auditorio
da Casa Consistorial da cidade, e a ela poderán acudir de balde todas aquelas
persoas con empresas ou ideas de negocio que desexen botar man da innovación
para mellorar o seu posicionamento no
mercado.
O encontro, que contou para a súa organización co apoio
do Concello de Vigo, será a única parada do periplo de Microsoft en Galicia, e para
participar hai que rexistrarse previamente na web oficial, onde ademais se pode
consultar a axenda de cada evento, futuras datas do road show e as ofertas específicas que ofrece cada empresa.
Na xira participarán 18 empresas, entre as que se atopan
ONO, a Escola Europea de Negocios, Prisa, HP ou APD, entre outras, que
ofrecerán solucións e estratexias de innovación tecnolóxica, xestión de
recursos humanos e coñecemento, ou mesmo vías de financiamento para a
internacionalización das empresas interesadas.
O obxectivo da multinacional creadora de Windows é
amosar ás PEME españolas até que punto a súa tecnoloxía “pode axudarlles a
reducir os seus custes e aumentar a produtividade e o rendemento”. O
programa de actividades conta tamén co apoio de Avalon Rede de Expertos, que é
quen organiza Impulsando PEME. Para as empresas, sinala con motivo da
presentación desta xira Juan José Amor, director da división de Pymes e
Partners de Microsoft Ibérica, “conseguir aforros de custes e aumentos de
produtividade e rendibilidade é clave para ficar no mercado; o uso das
tecnoloxías da información resulta crítico para acadar isto e evolucionar cara
a un modelo na nube que permitiría reducir gastos e mellorar a flexibilidade,
ademais de facer máis doado o emprego das TIC”. Segundo sinalou, as
ferramentas de produtividade na nube de Microsoft están xa dispoñíbeis dende
5,25 euros ao mes ofrecendo colaboración, comunicacións unificadas e un gran
abano de solucións e vantaxes para as pequenas e medianas empresas: dende o
sistema operativo pasando por solucións ofimáticas até solucións para
servidores e para software de xestión empresarial.