O proxecto Coruña Estudio Inmersivo da Deputación vén cun orzamento de 8,5 millóns de euros

A Deputación da Coruña presentou esta mañá os detalles do seu orzamento 2024, que será de 222.151.200 euros, o máis alto da historia da institución e un 7,2 % superior ao do actual exercicio. Así o fixeron saber o presidente da Deputación coruñesa, Valentín González Formoso; o vicepresidente Xosé Regueira, e o deputado de Facenda, José Ramón Rioboo, na rolda de prensa de presentación das contas da institución provincial para o vindeiro ano. Formoso dixo que este orzamento é “a folla de ruta que define as políticas do goberno provincial para o vindeiro ano e que 2024”, que “terá como principais prioridades a creación de emprego, o benestar social e o desenvolvemento do rural”.
Formoso destacou “a gran importancia de programas coma o Plan Único de Obras e Servizos (POS+) ou o Plan de Emprego Local (PEL), que “nos últimos anos foron fundamentais para a creación de emprego, infraestruturas e oportunidades, en particular nos pequenos municipios da provincia”.
Precisamente o PEL incrementa o seu orzamento en 2024 ata os 16 millóns de euros (un 24,1% máis). Facendo un algo de balance, o presidente provincial dixo que desde a súa creación “o PEL financiou a creación de 6.119 empregos nos sectores público e privado, apoiou a 2.553 empresas e 1.842 autónomos e concedeu 4.485 axudas directas aos sectores máis afectados pola crise (hostelería, agro, mar, transporte…)”.
Este incremento no orzamento, comentou, “permitirá reforzar programas de contratación de persoal en empresas e concellos e apoio ao emprendemento”, pero ademais, Formoso anunciou que “2024 será un ano de aposta pola industria”, en concreto por sectores estratéxicos como a biotecnoloxía, a economía circular ou o sector audiovisual, coa construción de Coruña Estudio Inmersivo (CEI), o maior estudo audiovisual virtual de España, que estará emprazado na Cidade das TIC (antiga Fábrica de Armas da Coruña). “O CEI”, dixo, “supón un investimento de 8,5 millóns de euros, co-financiado con fondos do Plan de Recuperación do Goberno de España no marco do proxecto España, Hub audiovisual de Europa”. A Deputación adxudicou o pasado agosto a Telefónica o desenvolvemento da tecnoloxía por 6,1 millóns de euros e vén de licitar a construción do edificio que albergará o CEI por 2,5 millóns de euros”, indicou o presidente
En 2024, a Deputación destina ademais 900.000 € para seguir desenvolvendo a Rede Provincial de Espazos de Coworking, que conta con 11 centros na provincia e permitiu xa a 200 emprendedores e emprendedoras pór en marcha os seus proxectos empresariais.