O profesor Íñigo Cuíñas preséntase para dirixir a ETSE de Telecomunicación a partir do 4 de marzo
martes, 24 de febreiro do 2015
A ETSE
de Telecomunicación elixe directora ou director o vindeiro 4 de
marzo, logo das dúas lexislaturas de Edita de Lorenzo, quen se
puxo á fronte da escola o 26 de febreiro de 2009, converténdose na
primeira muller cun cargo de máxima responsabilidade nunha das nosas
escolas de enxeñaría. Precisamente con Edita de Lorenzo como
directora, no seu equipo e como subdirector de Novas Titulacións,
traballou o que até o de agora é o único candidato para as
eleccións do vindeiro 4 de marzo, o profesor Íñigo Cuíñas. A súa
proposta é a dunha “continuidade natural do traballo desenvolvido
ao longo dos seis anos previos”.
O equipo que acompaña
a Cuíñas nesta candidatura está composto por Enrique Costa,
Francisco Javier Díaz, Manuel Fernández, Loreto Rodríguez e Miguel
Ángel Dominguez, este último o único que, xunto con Cuíñas,
repite respecto ao equipo anterior, no que era secretario do centro.
Segundo informa a
Universidade de Vigo, este luns celebrouse a proclamación
provisional de candidatos, que se tornará definitiva o xoves, tras
dúas xornadas para a presentación de reclamacións. Íñigo Cuíñas
aposta na súa candidatura por continuar coa liñas marcadas até o
de agora polo centro “pero tamén por sacar adiante novos proxectos
que por falta de tempo” non se puideron desenvolver”. Ao fío
disto, propón intensificar as políticas de captación de
estudantes, sobre todo para os mestrados, intensificar a cooperación
co tecido empresarial e apostar polos dobres títulos con centros
estranxeiros, para que xa existen tres potenciais colaboracións.
Polo que atinxe a Edita
de Lorenzo, deixa a dirección despois das dúas lexislaturas (o
máximo estipulado polos regulamentos) e faino “moi satisfeita e
moi agradecida”, sobre todo ao seu equipo, porque “tiven a sorte
de traballar con xente disposta e entregada”, sinala. Ao seu xuízo,
a súa experiencia á fronte da escola foi unha “oportunidade
persoal, como docente e como muller, e un reto do que aprendín
moito”. De Lorenzo salienta o proceso de internacionalización que
se abriu no centro, tanto a través de mobilidade de estudantes, PAS
e PDI, como de prácticas no estranxeiro e a docencia en inglés. De
feito, xa se imparten nesta lingua dúas especialidades do mestrado e
o proxecto fin de máster para todas as especialidades.