O presidente da Deputación da Coruña coñeceu de primeira man o potencial en transferencia do CITIC
venres, 1 de abril do 2016
O presidente
da Deputación da Coruña, Valentín González Formoso, puido coñecer
onte as principais liñas de traballo do Centro de Investigación TIC
da Universidade da Coruña, o CITIC. Foi grazas a unha visita
institucional ao centro, durante a que avogou “por aproveitar a
experiencia e coñecemento” da Universidade. A
toma de contacto co CITIC complementouse cun achegamento ao
viveiro de empresas da UDC no Campus de Elviña. Valentín González
que estivo acompañado polo reitor, Julio Abalde, fixo un chamamento
a xuntar forzas para “ter un mundo emprendedor ligado á
universidade, co obxectivo de que esta colaboración conclúa coa
transferencia de novas tecnoloxías e aplicacións á sociedade
civil”.
Durante a visita ao CITIC e ao viveiro o presidente
provincial avanzou que, dentro da liña de apoio a emprendedores do
Plan de Emprego que ultima a Deputación, prepárase un convenio de
colaboración coa UDC “para que calquera emprendedor da provincia,
especialmente no ámbito tecnolóxico, poida aproveitar estas
magníficas instalacións que ten a Universidade e os seus
coñecementos neste tipo de proxectos".
Pola súa banda, o reitor Julio Abalde recoñeceu
que a UDC e a Deputación "estamos a ver posibles canles de
colaboración", a través de unidades do parque tecnolóxico
como o CITIC e o viveiro de empresas "que cremos que son
importantes para o desenvolvemento de empresas dentro e fóra da
Universidade".
Segundo puido coñecer o presidente provincial en
persoa, no CITIC traballan a día de hoxe uns 230 investigadores que
colaboran cos responsábeis de sete empresas alí instaladas e que
desenvolven proxectos avanzados relacionados coas novas tecnoloxías
da información a través das seguintes áreas: Busca e Recuperación
de información para a empresa e a administración, Integración de
aplicacións e Información, Intelixencia Artificial e Aplicacións,
Matemática Aplicada e Estatística e Investigación Operativa, Media
en Rede e Fogar Dixital, Métodos de Utilizabilidade e Validación de
Sistema, Procesado de Imaxes Dixitais, Sistemas de Comunicacións Sen
Fíos, Sistemas de Información en Web, Sistemas de Información
Xeográfica e Sistemas Distribuídos e Arquitecturas orientadas a
servizos.
Segundo explicou o coordinador do CITIC, Manuel
González Penedo, durante a estadía no centro do presidente da
Deputación, este leva en funcionamento dende 2003 e dende aquela,
sinalou, “é un referente na simbiose do coñecemento universitario
co mundo empresarial", que enriquece o desenvolvemento de
numerosos proxectos en áreas tecnolóxicas do máis diverso.
Por outra banda, lembróuselle que o viveiro de
empresas conta actualmente con 5 iniciativas empresariais, ás que
proximamente se incorporarán dúas novas, e dúas spin-off,
empresas xa consolidadas que continúan usando este espazo. Dende a
súa fundación en 2004, o centro acolleu un total de 51 iniciativas
emprendedoras, das que 31 chegaron a afianzarse.