O prazo para presentarmos candidatura aos Premios das Telecomunicacións remata este 13 de xullo
xoves, 9 de xullo do 2015
- O Gran Hotel da Toxa, no Grove, sede da xuntanza profresional da AETG-COETG
O Colexio Oficial e a Asociación de
Enxeñeiros de Telecomunicación de Galicia (COETG-AETG) vén de
lembrar aos profesionais, investigadores, empresas e entidades do
ámbito TIC galego de que este luns 13 de xullo remata
o prazo para presentaren candidaturas aos Premios Galicia das
Telecomunicación 2015 convocados polo colexio e asociación.
Segundo lembran, estes galardóns constitúen “unha excelente
plataforma para a promoción e proxección das empresas e
profesionais galegos e para os produtos e servizos que se están a
desenvolver no sector TIC na nosa terra”.
Serán entregados durante a XX
Noite Galega das Telecomunicacións e da Sociedade da Información
organizada polo Colexio Oficial e a Asociación de Enxeñeiros de
Telecomunicación de Galicia (COETG-AETG) que terá lugar o 25 de
setembro de 2015 no Gran Hotel da Toxa baixo o lema Un mundo
conectado.
Por galardóns e obxectivos, lembrar
que o Premio Gerardo García Campos á mellor iniciativa
empresarial TIC, o Premio Gradiant á Mellor Tese
Doutoral aplicada ao sector TIC e o Premio Ineo
ao produto ou servizo TIC orientado ao Internet das cousas 2015,
teñen por obxecto “potenciar o noso sector salientando aquelas
empresas, desenvolvementos e investigacións aplicadas con maior
posibilidade de crecemento e proxección”. Convócase tamén o
Premio ao Mellor Proxecto TIC con Beneficios Sociais 2015,
en colaboración coa Axencia para a Modernización Tecnolóxica de
Galicia (AMTEGA), destinado a recoñecer os mellores proxectos no
ámbito das Tecnoloxías da Información e a Comunicación (TIC) que
contribúan e acheguen beneficios á sociedade.
Estes son son os galardóns, punto
por punto e especificándose a quen se dirixe e cales son as
recompensas incluídas ao seu abeiro:
Premio
Gerardo García Campos
A Asociación de Enxeñeiros de
Telecomunicación de Galicia convoca o Premio Gerardo García
Campos á mellor iniciativa empresarial no sector TIC 2015,
patrocinado pola Fundación homónima e dotado con 6.000 euros, é
unha iniciativa que premia aqueles proxectos empresariais emerxentes
no ámbito das Tecnoloxías da Información e da Comunicación que
representen unha innovación, coa finalidade de darlles un impulso
económico, empresarial e social a aquelas empresas que están
empezando a súa andaina.
Premio
Gradiant á Mellor Tese Doutoral
A Asociación de Enxeñeiros de
Telecomunicación de Galicia convoca o Premio Gradiant á
Mellor Tese Doutoral
aplicada ao sector TIC 2015. Coa concesión desta distinción
patrocinada pola Fundación Centro Tecnolóxico das Telecomunicacións
de Galicia (Gradiant) e dotada con 2.000 euros, preténdese fomentar
a realización de teses doutorais con potencial de aportar valor no
mercado como vehículo de xeración de coñecemento e recoñecer a
aqueles investigadores das universidades galegas que teñan
completada a súa tese doutoral nun eido aplicable ao sector TIC.
Premio
ao Mellor Proxecto TIC con Beneficios Sociais
A Asociación de Enxeñeiros de
Telecomunicación de Galicia convoca o Premio ao Mellor Proxecto
TIC con Beneficios Sociais 2015, que xa se ven concedendo dende
hai algúns anos xunto co resto de galardóns no marco da Noite
Galega das Telecomunicacións e da Sociedade da Información, en
colaboración coa Axencia para a Modernización Tecnolóxica de
Galicia (AMTEGA) da Xunta de Galicia. Este premio de carácter
honorífico, pretende recoñecer os mellores proxectos no ámbito das
TIC que contribúan e aporten beneficios á sociedade.
Premio Ineo ao produto ou servizo
TIC orientado á Internet das Cousas
A Asociación de Enxeñeiros de
Telecomunicación de Galicia convoca o Premio Ineo ao produto ou
servizo TIC orientado á Internet das cousas 2015, patrocinado pola
Asociación Multisectorial de Novas Tecnoloxías da Información e
Comunicación (Ineo) e de carácter honorífico, está destinado a
recoñecer ás empresas que estean a contribuír á modernización e
á innovación na economía galega.