O portal paraestudarlugo.com recibiu máis de 7.000 visitas
xoves, 18 de xuño do 2015
A Deputación de Lugo vén de facer un novo balance
da actividade xerada a través do portal paraestudarlugo.com,
que forma parte da campaña de promoción do Campus de Lugo posta en
marcha polo organismo provincial e a Universidade de Santiago (do que
forma parte o dito campus). A web, habilitada a comezos de xuño, xa
recibiu a visita de 7.000 persoas do ámbito estatal e do estranxeiro
interesándose polas oportunidades que ofrece a universidade lucense.
A cifra de accesos, en palabras da Deputación, proba non só a
eficacia da estratexia de promoción seguida (envorcada na Rede)
senón tamén o amplo potencial educativo dos centros universitarios
habilitados na Cidade da Muralla.
Volvendo ás visitas e abordándoas nun plano máis
detallado, sinalar que o 37% das consultas proviñeron da provincia
de Lugo. Con respecto ás restantes cidades galegas, as porcentaxes
son as seguintes: 16% Santiago de Compostela; 13% A Coruña; 8% Vigo;
4% Ourense e 3% Pontevedra. Dende outros puntos de España,
aumentaron aínda máis (en comparación cos primeiros datos) as
consultas de Madrid co 15% do total; e dende Barcelona, co 4%. Do
estranxeiro, foron o 36% das visitas, sobre todo de Rusia, Estados
Unidos e Alemaña.
En redes sociais como a páxina de Facebook da
Deputación de Lugo as publicacións sobre a campaña paraestudarlugo
tiveron un alcance de máis de 35.000 persoas, é dicir, triplicouse
en sete días. Estas súmanse ás 10.000 que o fixeron a semana
pasada.
Sinalar tamén que a campaña en liña forma dun
Plan de Choque posto a camiñar hai aproximadamente un ano da man da
Deputación e a USC, un programa co que se conseguiu un incremento de
matrículas dun 40% nas titulacións nas que non se cubrían as
prazas.
A través do Plan de Choque a Deputación ofrece por
segundo ano consecutivo descontos do 50% nos custen da matrícula a
estudantes que se matriculen por primeira en 10 graos do Campus de
Lugo. Son os seguintes: Enxeñaría de Procesos Químicos Industrias;
Enxeñaría Civil; Enxeñería en Xeomática e Topografía; Enxeñaría
Agrícola e Agroalimentaria; Enxeñaría Forestal e do Medio Natural;
Lingua e Literatura Españolas; Ciencias da Cultura e Difusión
Cultural; Relacións Laborais e Recursos Humanos; Xestión de
Pequenas e Medianas Empresas; e Administración e Dirección de
Empresas. O desconto do 50% aplicarase de xeito automático no
momento de pagar a matrícula.
O Plan de Choque que Deputación e USC puxeron en
marcha o ano pasado, promocionando Lugo como cidade universitaria,
rompeu coa tendencia á baixa de alumnos que experimentaba o Campus
de Lugo. “Deste xeito”, engadiron o presidente e o vicerreitor,
“as titulacións con menor demanda, cuxa primeira matrícula
custeou ao 50% o organismo provincial, experimentaron un incremento
do 40% no curso 2014-2015, pasando de 137 estudantes a 191”. Neste
senso salientaron a suba de graos como o de Ciencias da Cultura, que
pasou de 12 a 45 alumnos.