O portal galego-portugués Galarq beneficiarase da exhaustiva información sobre obras internacionais de Construdata21
venres, 21 de decembro do 2012
- Imaxe do acordo GALARQ-CONSTRUDATA21
A empresa galega
Construdata21 e Galarq,
portal galego-portugués de arquitectura e urbanismo, asinaron un
acordo en virtude do cal Construdata21 achegará cada semana a Galarq
unha escolma das obras que publique para incorporalas á dita web e
poidan servir de orientación a profesionais e empresas do sector da
construción na procura de emprego e de oportunidades de negocio.
Como lembraremos, Construdata21, de quen
falamos recentemente para informar de que está a piques de chegar ás
160.000 obras (se non as ten superado xa), é case con toda
probabilidade, a día de hoxe, o único
portal con información de proxectos e iniciativas de construción en
todo o mundo.
Volvendo a Galarq, dicir que grazas ao seu portal os
novos arquitectos poderán expor as súas obras, localizar
información sobre formación, novas do sector, ofertas de emprego e
en virtude da colaboración con Construdata21, obras e proxectos nos
que participar activamente.
O portal Construdata21, cuxa sede central está en
Vigo, é unha plataforma multilingüe que contén información
exhaustiva sobre obras de construción públicas e privadas, en todo
o mundo e en calquera fase de execución.
A iniciativa Galarq naceu
este ano promovida por un grupo multidisciplinar de novos arquitectos
e enxeñeiros da eurorrexión Galicia-Norte de Portugal, que
decidiron unir os seus esforzos na creación dun punto de encontro
común de información, promoción e investigación en arquitectura e
urbanismo, e destinado principalmente ao estudante e profesional que
comeza. Pretende, por unha banda, crear unha base de apoio constante
para os estudantes de arquitectura, “xa que é importante que
exista un lugar no que todo este sector poida resolver as súas
dúbidas ou consultas e dar renda solta ao seu enxeño sen medos nin
restricións”, sinalan os seus responsábeis. Por outra banda,
diríxese a axudar a novos arquitectos que se atopen no seu inicio
profesional e que non teñen a oportunidade de demostrar o seu
talento e creatividade.