O portal galego Imosver.com incorpora ao seu catálogo un amplo abano de xogos e consolas
venres, 13 de decembro do 2013
Os responsábeis de
Imosver.com, o portal galego
para a venda de libros e artigos de lecer en todo o mundo, veñen de
informarnos dunha novidade no seu seo de cara á campaña de Nadal na
que estamos mergullados. Máis en detalle, o portal amplía ao máximo
os seus horizontes engadindo videoxogos e consolas ao seu catálogo
de produtos. Segundo explican os promotores a plataforma, que se
ofrece en galego, castelán e catalán, “os videoxogos son un eido
de desenvolvemento tecnolóxico e de negocio que a día de hoxe conta
cun nutrido número de seareiros en todo o mundo, dende xogadores
ocasionais até programadores, e pasando polos gamers, cuxas
fileiras aumentan día tras día”.
Tendo en conta datos coma
os devanditos, dende Imosver lánzanse a achegar produtos como
videoxogos, accesorios ou as consolas da plataformas máis coñecidas,
como PlayStation, Xbox ou Wii. No catálogo da web galego os
seareiros atoparán “os xogos máis recentes e mellor valorados
polos afeccionados”, como por exemplo Grand Theft Auto V,
Assassins Crede IV Black Flag Day, Battlefield 4 ou Call of
Duty: Ghosts. Segundo apuntan,
atopar o videoxogo polo que devecemos en Imosver vainos resultar moi
doado, ao igual que navegar entre as distintas categorías. Ademais,
contan, “podemos aplicar filtros por novidade, prezo,
dispoñibilidade, idade recomendada do xogo ou tema do mesmo, de
maneira que podemos atopar os que mellor se adaptan ás nosas
necesidades de xeito cómodo”.
Lembrar que Imosver.com é
unha plataforma de comercio electrónico posta a camiñar hai pouco
máis de un ano. A plataforma conta arestora con máis de 2 millóns
de produtos en stock e máis de 400.000 produtos dispoñíbeis na web
de seu, entre os que cómpre salientar libros de texto, libros
electrónicos ou películas. Os responsábeis da plataforma constatan
que a traxectoria seguida é a todas luces ascendente, “baseada na
innovación e na adaptación aos novos mercados, e sempre pendente
das últimas tendencias, para ofrecer o mellor aos clientes”,
explican.