O persoal municipal compostelán prepárase para a chegada da eAdministración
mércores, 7 de novembro do 2018
A
eAdministración segue a dar pasos en Compostela, desta volta con
actividades de formación e capacitación destinado ao persoal
municipal: asentando os alicerces para as dixitalizacións que se
aveciñan. O proxecto de Administración Electrónica de Santiago, en
palabras do Goberno local “o proxecto de modernización máis
importante da historia recente do Concello”, subiu
un chanzo no mediodía deste 6 de novembro, cunha reunión de
traballo entre a empresa provedora do servizo, T-Systems, e as
xefaturas dos diferentes departamentos municipais.
Na
cita, a empresa deu a coñecer o traballo preliminar que tiña
elaborado sobre os procedementos a seguir unha vez implantada a
Administración Electrónica. Na xuntanza, as traballadoras e
traballadores puideron facer as súas achegas sobre os trámites
habituais nos seus departamentos e formular as súas dúbidas ao
respecto. Trala reunión, T-Systems completará nos vindeiros días o
catálogo de procedementos administrativos para seguir avanzando na
implantación do servizo.
O
Concello lembrou que o proxecto de eAdministración local vén cun
orzamento de máis de 1,8 millóns de euros, sendo a súa cerna unha
innovadora plataforma tecnolóxica integral que permitirá, entre
outras cousas, dotar ao Concello dunha sede electrónica, dun
rexistro electrónico e dun novo xestor de expedientes. Asemade, fará
avanzar a xestión tributaria e de tesourería, amais da xestión do
padrón de expedientes, axilizando, facilitando e protexendo todos os
procesos que son inherentes a estes servizos.