O papel podería desaparecer da Administración Pública no 2015
mércores, 6 de outubro do 2010
Se ben hai cousa dun mes anunciamos a
intención da Dirección Xeral de Función Pública da nosa Comunidade de implantar
un sistema de xeración e autorización documental baseado no emprego da sinatura
e validación electrónicas, agora é o goberno central o que, a fin de contribuír
co seu gran de area a coidar o medio ambiente, vén de anunciar a fin do papel
na Administración.
O Ministerio de Industria, Turismo e
Comercio fixou o ano 2015 como a “data
límite para eliminar totalmente o papel na Administración pública”, algo
que contribuirá, sen dúbida algunha, a evitar un pouco a degradación dos nosos
montes e vexetación.
Segundo informaron dende a entidade
pública, para implantar a eAdministración antes da data anunciada, “dixitalizaranse todos os trámites
administrativos, finalizarase a incorporación da sinatura electrónica (DNIe) e
farase unha migración de todos os rexistros cara o formato dixital”.
Asemade, Industria ten intención, entre
outras cousas, de mellorar as infraestruturas de telecomunicacións, de fomentar
a concienciación sobre o uso e a confianza en Internet e de darlle pulo ás TIC
en sectores estratéxicos; todo elo no marco do Plan Avanza 2.
En resumidas contas, para o periodo
2011-2015, o Goberno ten previsto potenciar a aplicación das novas tecnoloxías
en diversos eidos, facendo especial fincapé no sector da sanidade, no educativo
e no formativo, aforrando papel e custes en todos eles na medida do posible.
Por outra banda, se a primeira etapa do
Plan Avanza, que se desenvolveu entre 2005 e 2010, buscaba recuperar o retraso
de España respecto da Unión Europea (UE), os esforzos desta segunda fase do
devandito plan céntranse en situar ao noso país nunha “posición de liderato no desenvolvemento e uso de produtos e servizos
TIC avanzados”, algo que pasa primeiro por porlle fin ao papel na
Administración.