O novo director da ETSE de Santiago toma posesión oficialmente do seu cargo
luns, 23 de xullo do 2012
- O reitor da USC felicita a Antonio Mosquera e aos restantes membros da dirección do centro compostelán/ Foto de Santi Alvite
O
profesor do Departamento de Electrónica e Computación Antonio
Mosquera González tomou
posesión este venres 20 do seu cargo de director da Escola Técnica
Superior de Enxeñaría da USC, sucedendo no posto a Juan Lema
Rodicio, que ocupou a dirección dende 2003. O novo equipo de
dirección compleméntanno Francisco Omil Prieto, do Departamento de
Enxeñaría Química, como subdirector e Purificación Cariñena
Amigo, do Departamento de Electrónica e Computación, como
secretaria. A sesión protocolaria desenvolveuse no Salón de Graos
de San Xerome presidida polo reitor Juan Casares.
“A
nosa aposta é e será sempre pola calidade”
dixo Antonio Mosquera facendo referencia á traxectoria marcada polo
centro nesta súa primeira década de vida, amosando que o futuro
será á vez de continuidade e de constante renovación, pero sempre
atendendo á calidade, que, “nun
contorno con ofertas alternativas consolidadas é a única vía
posible”.
O novo director subliñou na dimensión docente as altas taxas de
rendemento e de éxito do alumnado das titulacións da Escola, a “boa
e rápida inserción laboral de titulados/as”
ou o constante crecemento das enquisas de satisfacción do
estudantado, aspectos que non deben facer esquecer que “aínda
queda camiño por percorrer”.
Sobre a actividade investigadora do centro, Mosquera fixo fincapé no
historial impecábel da ETSE en materia de I+D, xa que, engadiu,
estamos a falar dunha escola que produce, en porcentaxe, “o
dobre do seu tamaño como centro”.
E engadiu que o traballo que se desenvolve nos dous departamentos
adscritos á ETSE, sitúaa no 20% superior no ránking de
universidades españolas feito pola Universidade de Granada.
Antonio
Mosquera
Profesor
titular do Departamento de Electrónica e Computación, é doutor en
Física pola USC e ten recoñecido o Diploma en Docencia
Universitaria da USC. É autor de publicacións en diferentes campos
da docencia, incluíndo algunha en congresos sobre investigación en
docencia en informática e organizador de diversas actividades e
congresos de innovación docente.
No
ámbito da investigación, leva vinte anos traballando no eido da
visión por ordenador ademais de ter participado en mais de vinte
proxectos e convenios, ao que se suma a publicación de vinte
traballos en revistas especializadas e a súa participación en preto
de cincuenta congresos da especialidade.