O novo álbum de Beyoncé arrasa co seu lanzamento en primicia en iTunes
martes, 17 de decembro do 2013
O pasado venres a cantante Beyoncé Knowles sorprendeu estreando
directamente en iTunes o seu álbum BEYONCÉ,
no que recolle 14 cancións e 17 vídeos, no que dan en chamar un “álbum visual”
e que racharía
marcas na tenda musical de Apple con 828.773 copias vendidas en 3 días, das
que 617.213 corresponderían aos EE.UU., superando a actual marca da artista,
que conseguira vender 541.000 copias do seu segundo álbum en 2006 ao longo dos
seus primeiros 7 días.
Estamos ante unha curiosa xogada na que o formato descargable adiántase ao
físico, aínda que con detalles como ter moitos contidos multimedia e non
permitir a descarga individual de temas (o que claramente influíu no grande
volume de vendas do disco enteiro) para buscar unha experiencia completa.
O curioso xeito de realizar este lanzamento conseguiu evitar filtracións, de
xeito que foi toda unha sorpresa, conseguindo así un impacto moi importante,
aínda que este éxito tamén ten a súa contrapartida, e o disco físico de
Beyoncé, que espera saír á venda o vindeiro día 20, non
vai estar dispoñible nas tendas da cadea Target, que negouse a distribuír o
disco por mor da súa primicia dixital, por considerar que o feito de que o
disco puidese mercarse antes en dixital reduciría considerablemente as súas
previsións de vendas en soporte físico ata non compensar a súa comercialización
masiva en CD. Pola contra, a cadea Walmart non porá atrancos á distribución do
álbum, dando a impresión de que a política de Target é simplemente unha medida
de presión para evitar que outros artistas de éxito aposten polos formatos
descargables de xeito prioritario no futuro.