O noso tecido TIC tende novas pontes cos sectores do móbel, alimentación e téxtil
martes, 14 de xuño do 2016
Hoxe a Cidade da Cultura
acolleu o establecemento de novas e firmes ligazóns para estreitar o
traballo colaborativo entre o sector TIC galego, por unha banda, e os
sectores téxtil, alimentario e madeireiro, pola outra. Foi no marco
da Xornada Plans de Sistemas Sectoriais, que organizou o Instituto
Galego de Promoción Económica (IGAPE) en
colaboración co Cluster TIC Galicia. Nesta actividade, inserida
na Axenda de Competitividade Industrial, presentáronse as
conclusións recollidas nos plans para cada sector e acolleu, tamén,
unha mesa redonda cos representantes dos ditos tecidos produtivos.
Entre as principais conclusións figurou a seguinte: cómpre xuntar
forzas para establecer máis e mellores sinerxías e vínculos entre
as empresas. A xeito de exemplo e de primeira pedra do edificio a
construír, a xornada serviu (en si mesma) para asentar ligazóns
TIC-téxtil-madeira-alimentación.
No
encontro participou o conselleiro de Economía, Francisco Conde, que
foi o encargado de dar a coñecer algunhas das principais conclusións
dos estudos previos sobre a potencial sinerxía intersectorial
galega. Conde avogou ante todo por apostar polas persoas, os
traballadores, para que poidan tirar proveito das novas tecnoloxías
nos seus procesos produtivos e, tamén, para mellorar estes procesos.
Fixo tamén un chamamento a prol da formación: “Necesitamos non só
enxeñeiras, enxeñeiros, graduadas e graduados, senón tamén
persoal técnico”. Na súa opinión, se ben é grande o potencial
dos devanditos tres sectores para tirar o máximo partido dos achados
e desenvolvementos do noso tecido TIC, tamén é verdade que arestora
teñen un diferente nivel de implantación tecnolóxica nos seus
respectivos seos: no alimentario a taxa de penetración das
ferramentas tecnolóxico-dixitais é do 60%, no téxtil do 47% e no
móbel (madeira) do 13%.
- O conselleiro de Economía presentou no Gaiás os Plans de Sistemas Sectoriais
Segundo fixo saber, o
pulo transversal do sector TIC (a influencia lateral do tecido
dixital cara aos restantes eidos produtivos cos que comparte
escenario económico e xeográfico) é “clave para adaptar os
sectores estratéxicos galegos á revolución tecnolóxica da
Industria 4.0”. Conde tamén avanzou a posta en marcha dun programa
de apoio para as Iniciativas de Emprego de Base Tecnolóxica (IEBT)
encamiñado a “fomentar o espírito innovador e emprendedor,
principalmente entre os investigadores e titulados universitarios”.
O programa, dixo Conde,
inclúe tres tipos de axudas. As primeiras están destinadas á
creación directa de emprego estábel, dotadas con entre 6.000 e
9.000 euros; a segunda tipoloxía é para apoiar para a contratación
de persoal técnico de alta cualificación que terá como límite
máximo a contía de 18.000 euros. E a terceira liña busca a posta
en marcha de proxectos empresariais con axudas dun máximo de 24.000
euros.
Os Plans Sectoriais,
engadiu, “analizan polo miúdo o potencial e as necesidades de
mellora competitiva que as TIC poden achegar ás empresas galegas en
materia de conectividade, a dixitalización, o Big Data, e a
Internet das Cousas”.
Tamén lembrou que os
tres sectores obxecto do informe, sumados ao eido TIC, teñen uns
destinatarios directos de preto de 9.000 empresas.