O modelo de Ponte... Nas Ondas! recoñecido pola UNESCO estenderase no ensino galego
luns, 13 de novembro do 2023
Galicia
será pioneira en contar con centros que traballan cun modelo de boas
prácticas recoñecido pola UNESCO, o modelo galego-portugués de
Ponte... Nas Ondas!, que,
como lembraremos, bota man das novas canles e formatos de
comunicación (principalmente os podcasts) para estreitar lazos entre
as comunidades educativas de ámbalas beiras do Miño, poñendo o
foco na cultura inmaterial común. Segundo lembran dende PNO!,
Galicia será unha referencia a nivel internacional grazas a
extensión desta fórmula na súa educación, “pois non existe
actualmente ningunha rede de ensino formal deste tipo impulsada desde
un goberno”.
Así
o confirmou o Consello da Xunta do pasado xoves 9 de novembro, que
avaliou un informe da Consellería de Cultura, Educación, FP e
Universidades sobre a implantación deste modelo que ten como
finalidade concreta “a salvagarda do patrimonio cultural inmaterial
mediante a sensibilización das xeracións máis novas desde a escola
con actividades culturais e pedagóxicas”.
Dende
a asociación Ponte... Nas Ondas! valoraron moi positivamente esta
iniciativa da Xunta: “O sistema educativo galego será, así, un
exemplo en materia de sensibilización co patrimonio desde a nenez”.
A
incorporación desta acción ao sistema educativo farase a través
dunha convocatoria aberta a todos os centros públicos que, de xeito
experimental, contempla a adhesión nunha primeira fase de ata 20
centros públicos das etapas de Infantil, Primaria, ESO e
Bacharelato. Os seleccionados pasarán a formar parte da Rede de
centros Ponte... Nas Ondas!
Ponte
entre escola e sociedade
O
modelo internacional de educación en materia de patrimonio Ponte...
Nas Ondas!, recoñecido pola UNESCO hai un ano, será ademais un dos
eixos a debate no 6º
Congreso internacional Patrimonio inmaterial e educación. Ponte
entre escola e sociedade, que se celebrará entre os días 16
e 18 de novembro en Ourense e Portugal. A cita coincide co 20
aniversario da Convención de Salvagarda do Patrimonio Cultural
Inmaterial (PCI) da Unesco.
Ao
fío do Congreso, esta semana presentouse tamén no Concello de
Ourense un evento paralelo, dirixido ao público infantil, que terá
lugar de 11 a 13 horas, na praza Maior, e no que máis de 200
escolares de Primaria coñecerán unha ampla mostra de xogos
tradicionais, que aprenderán a practicar coa axuda de monitores. O
Congreso ten como sede a Facultade de Educación e Traballo Social do
Campus de Ourense (edificio de Ferro, que acollerá tamén a mostra
Imaxes do Patrimonio, e unha exposición do 20 aniversario da
Convención da Unesco de salvagarda do patrimonio cultural
inmaterial).
Tres
décadas de traballo en prol do patrimonio
A
Asociación Cultural e Pedagóxica Ponte… Nas ondas!, leva máis de
vinte e cinco anos traballando na divulgación do patrimonio
inmaterial galego-portugués. Coordinados por docentes galegos e
portugueses, milleiros de alumnas e alumnos de escolas de Galicia e
Portugal teñen participado nos certames de Recolla do Patrimonio
Inmaterial, Xornadas Multimedia ou Días Mundiais da Radio, entre
outros eventos e actividades organizados pola Asociación.
En
decembro de 2022 Ponte...nas Ondas! foi recoñecida pola UNESCO como
modelo de boas prácticas co PCI (Patrimonio Cultural Inmaterial)
sendo incluída no Rexistro das Boas Prácticas da UNESCO. A
candidatura foi presentada por parte de Portugal e España e é a
primeira inscrición para Portugal e Galicia.