O letrado das Cortes Pablo García Mexía expón en Santiago os riscos actuais para a Rede libre
mércores, 21 de outubro do 2015
Comezaron finalmente,
achegando partes actuais e actualizados da interrelación
TIC-Xustiza, as Xornadas
sobre Informática Xudicial que organiza o
Colexio Profesional de Enxeñaría Técnica en Informática de
Galicia, o CPETIG.
A quinta edición deste evento, que xunta arredor dun centenar de
profesionais de ámbolos ámbitos (novas tecnoloxías e Xustiza),
estase a desenvolver na Cidade da Cultura de Santiago centrando unha
boa parte do seu programa temático na cibervixilancia. A xornada
comezou ás 9.00 horas coa inauguración oficial a cargo do
vicepresidente da Xunta, Alfonso Rueda. Logo desenvolveuse o
relatorio Os retos xurídicos da ciberseguridade, a cargo do
letrado das Cortes, Pablo García Mexía, autor de A Lei na Rede.
O primeiro relator do día
puxo aos asistentes ao tanto do que implica, hoxe en día e dunha
maneira actualizada, o termo ciberseguridade. Falou de novos
escenarios bélicos, para os que unha chea de países se están a
preparar, incluído España. Falou tamén de ciberterrorismo e de até
que punto se estende e esa afianza esta modalidade de
ciberdelincuencia, chegando a estar promovida e auspiciada por
determinados Estados e entidades gobernamentais (non só por
internautas ou bandas de internautas ou por empresas que buscan
xeitos de facerse cos segredos de outras empresas). Na súa opinión,
aínda que o problema da ciberdelicuencia e o ciberespionaxe é un
problema que os gobernos deben ter moi en conta (e afrontalo e
combatelo), tamén é certo que hai unha liña de privacidade que non
se pode pasar. Un exemplo é a actitude recente que os Estados Unidos
fixeron da Rede e a información que acubilla, dando como resultado
unha actitude de “barra libre de datos en relación ás
operadoras”. Ao seu xuízo, hai unhas barreiras e unhas normas de
protección de información que cómpre respectar. “É necesario
salvagardar os dereitos e liberdades”, dixo, ao tempo que engadiu
que estas normas de conduta non són só aplicábeis a todos os
axentes que operan no ciberespazo e teñen ao seu alcance a
información dos demais, senón tamén a nós mesmos. “Debemos ter
en conta que unha vez que poñamos algo na nube, xa pode ser
accesíbel a outros”, sinalou.
García Mexía tamén
falou da conexión entre gobernabilidade e ciberseguridade e das
distintas modalidades que esta conexión adopta. Segundo fixo saber,
hai unha visión europea e occidental de como protexernos na Rede ao
tempo que protexemos a privacidade (COE Cybercrime Convention, o
Convenio de Budapest), trátase dun modelo de liberdades occidental
(“en Internet pódese dicir calquera cousa agás que sexa legal”).
Esta visión, porén, está en fase de risco polo medre e
espallamento doutras visións, as que achegan países como Rusia ou
China, que teñen outro punto de vista radicalmente diferente e que
choca de fronte, de maneira directa, coa Internet libre e aberta.
“Trátase este dun momento especialmente delicado no que nos
estamos a xogar a Rede”, explicou, engadindo a necesidade de
impulsar tratados internacionais de consenso.