O grupo USCAN3D da Universidade de Santiago lánzase a fomentar vocacións científicas botando man dos móbiles
xoves, 29 de novembro do 2012
Coa inminente
chegada do inverno, temos na
nosa Rede unha
actividade de moito potencial para dúas cousas básicas: ver nos
trebellos algo máis que simples aparellos para facer chamadas ou
escoitar música pola rúa e, por outra
banda, contribuír a espertar vocacións científicas entre a
xuventude botando man de tecnoloxías que coñecen ben. Se unimos
todo isto temos o primeiro Campionato de España de Modelado 3D de
Precisión co Móbil, unha actividade que
xa anunciamos en Código Cero hai uns días con motivo da súa
presentación oficial en Santiago e
que está a a piques de
dar forma á web de seu, d3mobile.es,
unha páxina onde poderemos informarnos de todo o relativo a esta
proposta, que se dá a coñecer, de novo, o
vindeiro 4 de decembro na Sala de Xuntas da
Escola Politécnica Superior da USC no Campus de Lugo.
Trátase, máis polo miúdo, dunha
iniciativa pioneira a nivel mundial, a modo de certame, coa que se
pretende fomentar a cultura e a vocación científica entre os máis
novos, pois o proxecto vai dirixido a mozos e mozas de 4º de ESO e
Bacharelato. A actividade vén da man do grupo de investigación
USCAN3D da USC, que salienta que “estamos ante a primeira
vez que se organiza un proxecto desta natureza no mundo, mediante o
que se pretenden potenciar as vocacións científicas a
través dun elemento de uso tan cotián entre os máis novos como é
o teléfono móbil”. O profesor da USC Juan Ortiz, director do
proxecto, debulla deste xeito os motivos principais para a posta en
marcha da actividade: “Os modelos 3D de precisión úsanse
de continuo en ámbitos tan próximos á cultura xuvenil como
o cine, o fútbol, a Fórmula-1, a moda ou os videoxogos; os
mozos sorprenderanse das posibilidades que ofrece un teléfono móbil
para a realización de modelos deste tipo, do doado que
resulta facelos e do rápido que acadan resultados ao tempo que se
divirten”.
Metodoloxías para participar
Os participantes deberán organizarse
en grupos de 2-4 compañeiros e buscar o apoio dun profesor. Os
alumnos, informan os responsábeis da iniciativa, aprenderán a
elaborar modelos tridimensionais cos seus terminais móbiles, o seu
propio computador e un software fotogramétrico libre. A xuízo dos
membros do dito grupo da USC, “a habilidade no manexo das
novas tecnoloxías por parte dos máis novos garante que en dúas
tardes ou mesmo en menos tempo se adquiran as destrezas
precisas para participar no campionato”. A
competición en si mesma desenvolverase cen por cen en liña, e
consistirá, basicamente, en dar co equipo que sexa quen de medir e
modelar obxectos en 3D coa maior calidade métrica e visual.
Presentación en Lugo
O acto de presentación do certame
desenvolverase o martes 4 de decembro ás 12.00 horas na Sala de
Xuntas da Escola Politécnica Superior de Lugo, e contará coa
presenza do vicerreitor de Coordinación e Planificación do Campus
de Lugo, Pedro García Herradón; o vicerreitor adxunto de
Investigación do Campus de Lugo, Pablo Ramil; e o director do
proxecto, Juan Ortiz.
Engadir que este proxecto, promovido
desde o Grupo de Investigación para a Documentación en 3D da USC (USCAN3D), foi un dos 212
elixidos de entre os 1.295 presentados este ano ás axudas para o
fomento da cultura científica e da innovación, que outorga a
Fundación Española para a Ciencia e a Tecnoloxía (FECYT).
O Centro Español de Metroloxía (CEM)
e o Centro Nacional de Información Geográfica (CNIG) forman parte
tamén do grupo de entidades organizadoras. Entre os patrocinadores
figuran, asemade, a Consellería de Cultura da Xunta, a Deputación
Provincial de Lugo e a Fundación Vodafone España, ademais da propia
Escola Politécnica Superior da USC no Campus de Lugo.