O grupo HealthyFit da UVigo confirma os beneficios da Realidade Virtual para as persoas con Párkinson
xoves, 9 de decembro do 2021
O
grupo
HealthyFit da Universidade de Vigo (integrado por investigadores das
facultades de Ciencias da Educación e do Deporte e Fisioterapia) vén
de constatar as posibilidades da Realidade Virtual como ferramenta
terapéutica eficaz para persoas con Párkinso. Fíxoo en
colaboración coa Asociación Párkinson Vigo e empregando diversos
dispositivos, xogos e experiencias que lles permitiron comprobar o
factíbel destas tecnoloxías para incrementar o benestar e a
motivación das persoas coa dita doenza e, ademais, sen efectos
adversos de ningún tipo.
Os
investigadores, logo dunha primeira fase de exploración, abordaron
hai unhas semanas o miolo do seu proxecto, rexistrando polo miúdo os
beneficios da práctica regular dun programa de exergaming
baseado no uso de xogos para lentes de Realidade Virtual que requiren
dunha participación fisicamente activa do usuario.
Este
rexistro foi documentado nun artigo polo investigador Pablo Campo, o
coordinador do grupo HealthyFit e profesor da Facultade de Ciencias
da Educación e do Deporte, José María Cancela, e o docente da
Facultade de Fisioterapia Gustavo Rodríguez. A investigación foi
publicada na prestixiosa revista Sensors.
Segundo
explica o coordinador do grupo respecto dos traballos desenvolvidos,
“os resultados foron moi bos e xerouse unha adherencia cara este
tipo de práctica, dadas as sensacións que percibían e a novidade
que implicaba”. Pablo Campo engade que “a novidade deste estudo é
que, se ben as novas tecnoloxías estanse a implantar na
rehabilitación física e cognitiva, estas aínda non se aplicaran ao
ámbito de enfermidades neurodexenerativas como pode ser o
Párkinson”.
O
estudo piloto levado a cabo na Facultade de Ciencias da Educación e
do Deporte cun HTC Vive ProTM, un dispositivo de entretemento
comercial, buscaba analizar como pacientes de diferentes perfís
reaccionaban ante un xogo físico en Realidade Virtual inmersiva.
Para iso, leváronse a cabo unha serie de probas con catro membros da
Asociación Párkinson Vigo, tres homes e unha muller de entre 53 e
71 anos, cos que se empregaron xogos comercialmente dispoñíbeis. En
dúas sesións, os participantes realizaban con este dispositivo unha
experiencia “preadestramento” de aclimatación, para logo
enfrontarse a un xogo que lles requiría, como explica Campo,
“movementos variados de todo o corpo cun esforzo moderado”, cunha
esixencia maior na segunda das sesións. En ambos casos os
participantes foron monitorizados durante toda a actividade, co fin
de desbotar efectos adversos; á vez que se realizou un exame da
experiencia de xogo, do grao de satisfacción dos participantes e da
súa percepción do esforzo realizado. Segundo recolle o artigo, os
resultados amosan que foi unha experiencia positiva, con “actividades
apropiadas, divertidas e motivadoras”.