O galego Javier Penedo estrea un podcast no que recolle o mellor da música Sin Reservas
mércores, 25 de xuño do 2008
Javier Penedo, quen fora
presentador de Plató Aberto en
Localia Santiago e director de informativos de Código TV,e actualmente presenta
os grandes éxitos dos 70, 80 e 90 na emisora M80 Radio, estreou o pasado mes de
xaneiro un blog onde recolle o que considera o mellor da música.
Agora, para completar esta serie de recomendacións musicais, Penedo estrea
un podcast chamado Sin Reservas,
espazo semanal dunha hora de duración que recolle unha selección musical de
grande calidade nun formato moi radiofónico e atractivo que vai dirixido «a todos os melómanos que se sente orfos».
Sin Reservas achéganos moitos
clásicos inesquecibles, versións de calidade e incluso novidades musicais que
normalmente pasan desapercibidas. O programa pódese escoitar directamente dende
o blog de Los Discos de Penedo,
descargar en
MP3 para escoitar en calquera momento e lugar e mesmo conta cun fluxo para
subscribirse ao mesmo dende aplicacións coma iTunes.
Na súa primeira entrega permite gozar dun par de temas da Steve Miller Band, de
clásicos de Van Morrison e Neil Diamond e mesmo dun tema do último disco de
Michael McDonald. En definitiva, un espazo radiofónico musical ideal para levar
no reprodutor multimedia para suplir a ausencia deste tipo de cancións nas
emisoras de radio actuais.