O futuro dos medios e a encrucillada do dixital, a debate nos Luns do Ateneo
martes, 1 de abril do 2014
Revistas e xornais que deixan de existir, quioscos
que pechan as portas, publicacións que non acadan apoios de abondo
na Rede para seguir existindo (por
exemplo a revista Oink!). Esta é a realidade que vivimos
e moitos de nós facémonos a seguinte pregunta: como se chegou a
esta situación? Para falar precisamente dos antecedentes da crise
actual da prensa escrita e tentar ao mesmo tempo visualizar vieiros
de futuro (vieiros sobre todo dixitais) organizouse esta semana, ao
abeiro do ciclo Luns do Ateneo, unha interesante mesa
redonda na que participaron o decano do Colexio de Xornalistas de
Galicia, Xosé Manuel Pereiro; o subdirector de El Correo Gallego,
Caetano Díaz; a xornalista de Sermos Galiza, Olalla Rodil; e o
coordinador da Revista Luzes, Iago Martínez.
Entre outras cousas, falouse na cita (celebrada no
Ateneo de Santiago e
presentada polo profesor da Facultade de Ciencias da Comunicación,
Xosé Ramón Pousa) da incidencia dos medios dixitais na caída de
vendas das publicacións tradicionais (estamos a vivir un evidente
punto de inflexión no que a hábitos de lectura de informacións se
refire) e nas posibilidades que achegan as redes para permitir dalgún
xeito a supervivencia dos medios que arestora se atopan na picota. Ao
fío disto, unha das conclusións ás que se chegou é que vai ser
extremadamente complexo atopar na Internet unha actividade económica
e un volume de ingresos que se acheguen de lonxe ao que se xeraba a
través das vías tradicionais. Polo tanto, o novo modelo
xornalístico que agardamos que chegue ao abeiro das redes, non dá
chegado, e dificilmente se albisca ao lonxe a súa consolidación.
Probabelmente a visión máis optimista das
achegadas no debate foi a de Pereiro, decano do Colexio de
Xornalistas ao tempo que promotor da revista Luzes, quen
avogou por estarmos atentos aos novos nichos de actividade que se
están a abrir coa crise (e malia a crise) para o afianzamento de
medios especializados a contramán da prensa xeral. Fixo na súa
intervención claras referencias a Luzes,
que como lembraremos é unha nova revista galega con formato en papel
e presenza na Rede, cuxo primeiro número saíu do prelo o pasado 29
de novembro presentándose como unha acción revitalizadora dunha
prensa galega adoecida por mor da crise e a falta de independencia.
Diferente visión foi a que achegou Caetano Díaz,
que lembrou que a situación actual deixou xa a 30.000 profesionais
do sector na rúa, levando ao peche a 22 diarios e a case duascentas
empresas deste eido de actividade. Tamén falou dos novos medios
xurdidos no medio da crise, un bo feixe deles, pero agoiroulles o que
por desgraza só se pode cualificar de “incerto futuro”. Pola súa
parte, Iago Martínez amosouse confiando no futuro dos medios en
papel e avogou por unha “rexeneración económica, tecnolóxica e
política do xornalismo”. Para rematar, Olalla Rodil falou da súa
experiencia en Sermos
Galiza, un medio galego que conxuga con éxito as facianas
dixital e tradicional, cunha páxina web consolidada xa entre os
lectores galegos e un semanario que serve de complemento e tamén de
complementador. Lembrou que Sermos basea a súa
actividade no apoio dos seus 900 socios que achegaron os 300.000
euros precisos para permitir que o proxecto se convertese en
realidade.