O festival PortAmérica de Nigrán afiánzase na Rede cunha comunidade virtual de creatividade colectiva
luns, 16 de xullo do 2012
PortAmérica é, para quen non o saiba a estas
alturas e ande pensando en cousas que acontecen lonxe, un festival galego de música, audiovisual e
innovación creativa que se celebra en Nigrán, no Porto de Molle entre o 19 e o
21 de xullo, e que pretende amosar o potencial da cultura como motor de
dinamización e desenvolvemento, e facer, amais, que o motor prenda e se manteña
aceso a ámbalas beiras do Atlántico e demais océanos. Para acadalo e ir
acubillando combustíbel, a empresa responsábel do festival, Esmerarte, puxo en
marcha unha comunidade en liña que
funciona, en palabras dos profesionais da firma, “como unha plataforma virtual para difusión do talento”. Ao festival
galego vén de engadir a súa presenza, os días pasados, o multipremiado servizo
Filmin.
PortAmérica, o Festival de Música e Ideas,
conta tamén no seu programa cun bo número de actividades dirixidas a pór de
manifesto unha capacidade que non chega con ter, senón que cómpre materializar
e compartir: o talento. Falamos de MercaInnova
(un escaparate de ideas novas) e Gastro (obradoiro
gastronómico).
Volvendo ao foro virtual, dicir que xa está en
marcha e que é de acceso gratuíto para todo aquel internauta que queira amosar
os seus proxectos e ideas dende calquera recanto, alén das datas de realización
do festival. Segundo contan dende Esmerarte,
unha firma con sede Vigo especializada en xestión cultural e comunicación, a intención
é que tanto o festival como a comunidade virtual teñan alcance iberioamericano
e, como se dá a entender no nome da proposta, translatántico. A plataforma é de
libre temática: está a dar cabida a ideas de negocio, iniciativas sociais ou
proxectos encamiñados a dar pulo ao traballo cooperativo, o intercambio de
coñecemento e experiencias e os eidos de traballo en mancomún. En definitiva,
sinala Esmerarte, “propostas que melloren
o noso contorno e sensibilicen á poboación respecto ao medio ambiente, inventos
ou servizos que nos axuden a axilizar procesos, a comunicármonos, a mellorar a
claridade de vida ou a optimizar recursos”. En base a isto, engaden, a innovación
e a creatividade serán o alicerce que sosteña a iniciativa, tendo sempre en
conta o papel que van representar -de seguro- como recurso anticrise e como fonte de ideas para acadar novos vieiros de
actividade produtiva diferente da que nos levou, directamente, á situación económica
na que todos estamos. Para favorecer todo isto, a comunidade é en si mesma un
espazo de coworking virtual, “un lugar dende o que falarlle ao mundo, á
poboación en xeral e a entidades que procuran facer as cousas de xeito
diferente”.
Para participarmos na rede social de
PorAmérica só teremos que abrir un perfil na rede Facebook ou en calquera outra
semellante: abonda con rexistrarnos cunha conta de correo electrónico e un
usuario e de maneira automática abrirase un espazo propio. Este perfil de
usuario é o lugar para presentármonos ao mundo, introducindo unha descrición da
nosa traxectoria amais de datos básicos propios. Unha vez feito o rexistro, xa é
posíbel publicarmos o proxecto ou proxectos, amais de descubrir as propostas
dos restantes membros, nos que incluso poderemos participar directamente.
En cada ficha de iniciativa é posíbel
compartir textos, ligazóns, fotos e vídeos. Con este fin, e co obxectivo de
favorecer unha divulgación ordenada e con meirande visibilidade, dende PortAmérica
creouse un hahstag propio, #ComparteTalento,
cuxo obxectivo é o de facer que o usuario poida etiquetar as súas propostas e
compartilas a través das redes sociais convidando aos seus seareiros a difundir
esa mesma idea.
Entre as novas achegas que se veñen de unir á
comunidade-festival atópase, como dixemos ao comezo deste artigo, o servizo Filmin, un portal creado en 2006
dende Catalunya co firme apoio de produtoras como Alta ou El Deseo e con vocación
de dar a coñecer, en España e máis no mundo, as novas obras e tendencias
xurdidas ao abeiro da alianza do cinema e a innovación. Filmin, un videoclub en
liña en clave de vangarda, é pioneiro en achegar tarifas planas, streaming en HD e na estrea simultánea
de películas en cinema e máis en Internet. En 2011, os seus responsábeis foron
recoñecidos co Premio Time
Out ao mellor proxecto de innovación. Entre outras cousas, Filmin
participará no festival PortAmérica coa proxección do documental All Tomorrow´s Parties, que distribúe o
selo Avalon, que recolle a historia do festival de música do mesmo nome e que
vén da man do director John Caouette e o fotógrafo Vicent Moon.