O evento #Culturalike puxo de manifesto o poder creativo e divulgador das redes
luns, 13 de decembro do 2021
A
Cidade
da Cultura acolle este sábado 11 a terceira edición do
#Culturalike, un encontro promovido pola Xunta de Galicia para
reflexionar sobre as claves da divulgación cultural e científica en
Internet. O faladoiro, que puido seguirse de xeito presencial e de
balde na Biblioteca de Galicia e tamén a través de streaming,
foi coordinado por dous grandes divulgadores da Rede, e comisarios da
mostra na que se enmarca o encontro: os galegos Deborah García
Bello, Deborahciencia, e Miguel Ángel Cajigal, El Barroquista.
Para
“afondar no papel actual das comunidades dixitais na difusión de
coñecemento cultural e científico”, un dos grandes obxectivos da
cita, contouse coa presenza da escritora Espido Freire, a bióloga
especializada en neurociencia Tamara Pazos, a historiadora da Arte
Sara Rubayo, o químico Juan Manuel Bermúdez ou a enxeñeira
especializada en materiais sustentábeis Gemma Rojo.
Tamén
interveu Anxo Lorenzo, secretario xeral de Cultura, quen subliñou o
“grande valor de Internet como aliada e cómplice na creación,
difusión e educación en cultura”, destacando o potencial das
redes sociais para “rachar cos límites físicos; reforzar a
democratización da cultura e sacar as disciplinas artísticas fóra
dos espazos tradicionalmente establecidos”. Neste punto, salientou
a importancia da mostra (habilitada no Museo Gaiás) Galicia
futura, “un proxecto que encaixa á perfección coa filosofía
deste encontro, e no que as tecnoloxías, a ciencia, as novas
linguaxes artísticas, o diálogo entre distintas áreas do
coñecemento e a creación de novos relatos dixitais, culturais e
científicos teñen un peso destacado”.
O
evento #Culturalike3 artellouse en dúas sesións con dous eixos
diferenciados: a primeira sesión centrada no papel das comunidades
dixitais na difusión de coñecemento cultural e científico
(contando con relatoras como Sara Rubayo, historiadora da Arte e
responsábel da canle de YouTube La Gata Verde; a escritora de
orixe galega Espido Freire, recoñecida pola súa faceta dixital co
Premio Influencers á “máis destacada figura cultural de 2018”;
e a bióloga coruñesa especializada en neurociencia Tamara Pazos,
coñecida nas redes como @putamen_T.
O
segundo eixo foi a sustentabilidade aplicada a diferentes eidos
creativos. Interviñeron Gemma Rojo, enxeñeira do Centro de
Innovación Tecnolóxica en Edificación e Enxeñería Civil
(CITEEC), da Universidade da Coruña, que investiga o desenvolvemento
de formigóns máis sustentábeis, e Juan Manuel Bermúdez, doutor en
Química Ambiental e Fundamental e investigador no Centro de
Investigacións Científicas Avanzadas (CICA) da Universidade da
Coruña, e un dos descubridores da perovskiña, un material
sólido refrixerante que pasa por ser unha alternativa ecolóxica,
innovadora e segura aos refrixerantes gasosos que se empregan hoxe.
Completou o programa Laura Opazo, comunicadora especializada en moda
sustentábel, consumo intelixente e consciente, e a propia Deborah
García Bello, que compaxina o seu traballo de investigación en
Química coa divulgación a través de plataformas propias e medios
de comunicación.