O director editorial de InfoLibre amosa a súa visión do xornalismo dixital en Compostela
martes, 10 de decembro do 2013
O director editorial do
diario dixital InfoLibre,
Jesús Maraña, estará este 12 en Compostela para participar nun
encontro con estudantes de Xornalismo acerca da viabilidade dunha
comunicación independente, desligada até onde sexa posíbel de
intereses económicos ou políticos. Na charla, ás 11.00 horas no
Auditorio da Facultade, o xornalista estará acompañado do decano da
Facultade compostelá de Ciencias da Comunicación, Xosé Pereira, e
do redactor xefe de InfoLibre, Fernando Varela.
Lembrar que este medio
de comunicación en liña é unha canle en castelán creada por
profesionais procedentes, entre outros, do diario Público, El
País e Radio Televisión Española, con liña editorial
independente e progresista, e publicado por primeira vez o 7 de marzo
de 2013. Ademais, trátase dun referente no eido de medios dixitais
españois, tanto pola súa repercusión a nivel informativo (ocupa os
postos máis altos dos rankings de independencia informativa)
como polo modelo de negocio adoptado, parcialmente de pago e pechado
para subscritores. Os abonados, por certo, reciben un avance diario
de contidos cara á medianoite e unha revista mensual en papel e en
formato dixital, TintaLibre, dedicada ás crónicas e
reportaxes, e cuxo primeiro número saíu a venda o 9 de marzo de
2013.
Ao fío de TintaLibre
e volvendo á cita de Santiago, dicir que previamente á celebración
da mesma, o mércores 11 tanto o xornal dixital como a súa revista
mensual en papel organizan en Santiago un coloquio sobre o futuro do
xornalismo ceibe de intereses e presións nuns tempos de crise nos
que, consideran, “a industria tradicional dos medios de
comunicación dá mostras cada vez máis evidentes de debilidade
económica e de entrega ao pensamento único”. Reflexionarán sobre
isto o mércores ás 19.00 horas na Galería Sargadelos o propio
Maraña, o decano do Colexio de Xornalistas de Galicia, Xosé Manuel
Pereiro, e o líder de Siniestro Total e colaborador habitual de
diferentes medios de comunicación, Julián Hernández.