O director da Fundación para o Ensino Virtual amosa no CiTIUS a potencialidade TIC para emprendedores
martes, 12 de febreiro do 2013
Este mércores 13 de
febreiro teñen en Santiago unha
cita de primeira liña as persoas interesadas en emprendemento e, sobre
todo, nos recursos en liña dispoñíbeis para axudarlles a converter
unha idea/proxecto nunha empresa. O encontro Laboratorio
EmprendeLab será no edificio CiTIUS da Universidade de
Santiago, a partir das 12.00 horas. Contará coa presenza do ex
reitor Senén Barro (presidente actual de RedEmprendia) e de Daniel
Torres, director da Fundación Centro Superior para o Ensino Virtual
(CSEV), que será o convidado especial da xornada e que falará,
entre outras cousas, da evolución da figura do emprendedor na
sociedade, “reconstruída de xeito progresivo nos
últimos anos”, informa o CiTIUS. Non só a nivel de materias
primas a empregar (non se concibe xa este labor sen un aproveitamento
máis ou menos integral das ferramentas e canles 2.0), senón tamén
de metodoloxías (trabállese un pouco como usuario TIC á procura de
amizades e seareiros, todo isto aplicábel ao eido do mercado).
Segundo informa o centro
de I+D compostelán, a cita servirá para tirar interesantes
experiencias e visións acerca do emprendedurismo. Amais tamén
haberá sorpresas, coas que se pretende “probar de que xeito o
espírito emprendedor volve á primeira fileira da actualidade”. De
feito, engade, estamos a vivir a que probablemente sexa a era das
ferramentas a nivel de busca de nichos e de actividades de mercado.
Estes recursos, non exclusivamente tecnolóxicos aínda que tamén,
“están hoxe en día ao alcance de calquera persoa, e
milleiros de emprendedores as empregan xa como pancas de medre
persoal e profesional”. Na sesión establecerase “un
intenso diálogo sobre estas cuestións”, aproveitando os
instrumentos dispoñíbeis para varrer as tradicionais fronteiras
entre os eidos da aprendizaxe, a participación cidadá, o goberno e
a innovación aberta.
Sobre Daniel
Torres
Daniel Torres Mancera é
enxeñeiro de Telecomunicacións polo Instituto de Empresa, e Máster
Executive MBA por ISEM (Universidade de Navarra). Dende hai 20 anos,
traballa no ámbito de desenvolvemento de proxectos e negocios da
Sociedade da Información, tanto no sector privado como na
Administración Pública. Na actualidade dirixe a Fundación privada
Centro Superior para o Ensino Virtual (CSEV). Antes de incorporarse a
esta fundación, foi director do Observatorio Nacional das
Telecomunicacións e a Sociedade da Información (ONTSI), así como
asesor do Secretario de Estado de Telecomunicacións. Como docente
dirixiu áreas académicas en distintas escolas de negocios,
colaborando asemade con numerosas organizacións non gobernamentais
(ONG).