O deporte galego axúdanos a facer exercicio durante o confinamento a través de Adestra #NaCasa
xoves, 16 de abril do 2020
Quen
queira practicar deporte durante o confinamento, respectando as
normas do Decreto de Alarma, vai contar cun novo recurso unificado
para facelo. Estamos
a falar do espazo Adestra #NaCasa no que as federacións deportivas
de Galicia amosan o seu traballo cos deportistas no período de
confinamento. A iniciativa, posta
en marcha pola Secretaría Xeral para o Deporte, está accesíbel na
propia web deste departamento autonómico. Trátase, nas súas
palabras, “dunha mostra da creatividade do tecido deportivo ante a
situación que estamos a vivir”.
Na
iniciativa tamén participa a CRTVG, emitindo nos seus informativos
imaxes de vídeo na que os técnicos indican as pautas que seguen os
deportivas de alto nivel durante a reclusión.
Esta
ferramenta nace das reunións que o Goberno galego está a manter cos
responsábeis do tecido deportivo galego sendo os técnicos do Centro
de Tecnificación Deportiva os pioneiros no seu uso. Inclúe
arquivos, documentos, ligazóns e material de diversa índole
orientado ao adestramento na casa durante a crise sanitaria.
Na
páxina web da Secretaría Xeral para o Deporte pódense consultar a
día de hoxe os plans de traballo para os deportistas das federacións
galegas de atletismo, bádminton, balonmán, fútbol, karate, judo,
loita, natación, piragüismo, remo, salvamento e socorrismo,
taekwondo, tríatlon e péntatlon moderno, xadrez, ximnasia e vela.
Ademais
da planificación deportiva de cada federación con vídeos de
exercicios físicos para realizar na casa, as federacións tamén
achegan unha serie de pautas psicolóxicas a seguir na casa para non
perder o ánimo e manter a concentración.