O debuxo 3D, a fabricación dixital e o Power BI centran os novos obradoiros de SmartPEME
luns, 13 de xuño do 2022
A
Deputación de Pontevedra, a través do
programa de formación tecnolóxica SmartPEME, oferta esta semana
catro novas accións formativas impartidas de xeito online
e presencial, enmarcadas na súa carteira de obradoiros. Os talleres,
orientados a persoas autónomas e pequenas e medianas empresas en
pleno proceso de formación, tratarán temas como o debuxo 3D con
Onshape e Assembly, deseño de imaxes para preimpresión e medios
dixitais, fabricación dixital con impresoras de resina ou
utilización do programa Power BI.
Este
martes 14 de xuño pola mañá, Manuel Freire, experto universitario
en Robótica, Programación e Impresión 3D, impartirá un obradoiro
sobre fabricación dixital cos programas Onshape e Assembly. Nestes
cursos en formato mixto, combínanse clases en liña e prácticas
presenciais no Fab Lab do Centro Provincial de Economía Dixital no
Viveiro de Empresas de Barro. O curso Fabricación dixital. Debuxo
con Onshape VI – Assembly II, ten como obxectivo “coñecer e
familiarizarse coas ferramentas implicadas nun proceso de produción
dixital”.
O
mércores 15 de xuño pola mañá, Lara Taboada, titulada superior en
Ensinos Artísticos de Deseño Gráfico, amosará os distintos
aspectos sobre composición e deseño, ademais de diferenzas entre as
imaxes que se subirán a contornas dixitais, ou as que se usan para
un acabado de impresión, no obradoiro Deseña e crea as túas
imaxes para preimpresión e medios dixitais.
O
xoves 16 de xuño, ás 11:00h, celebraranse dous obradoiros. O
primeiro será Fabricación dixital. Impresoras de Resina, un
novo itinerario de fabricación dixital que comezou en maio, e no que
se combinan clases telemáticas e presenciais no Fab Lab de Barro, co
obxectivo de que o alumnado teña contacto real con este tipo de
tecnoloxías e sexa capaz de deseñar e fabricar unha peza en 3D.
Esta acción formativa será impartida tamén por Manuel Freire.
No
segundo obradoiro, Laureano Pérez Soto, director executivo (CEO) de
Datasight Consulting impartirá Power Bi, a ferramenta analítica
para o noso negocio ou peme, no que explicará o
que é este sistema, o seu funcionamento e a importancia dos datos na
toma de decisións das pequenas e medianas empresas.