O colectivo de motomontañismo Os Toxeiros presenta web (aberta e colectiva)
mércores, 3 de xaneiro do 2007
A
nova orde de Internet que algúns denominan “a 2.0” (se é que é realmente
nova e o que é novo é o noso xeito de ollala), está a chegar a tódolos
recunchos onde hai xente farta do Flash e das webs pechadas, dos contidos sen
orde e das letras que che obrigan a poñerte a un palmo da pantalla.
Este xeito
distinto de entender Internet podémolo atopar xa reflectido en determinadas páxinas
web da nosa terra onde case perdemos a arela de atopalo. Por exemplo: nos
sitios vinculados ó deporte.
Todo isto vén a conto pola web que vén de
presentar o colectivo de motomontañeiros Os Toxeiros, un espazo en liña
galego que, malia non ofrecer versión na nosa lingua (agardamos que a inclúan
en breve, ou a que os membros da asociación se animen a facer as entradas en
galego), bota un pouco de aire fresco na “sección
deportes” da Internet galega, achegando feitura de blog, limpeza no deseño
e, sobre todo, sensación de que hai de verdade alguén ó outro lado da pantalla,
resolvendo dúbidas ou achegando datos.
A web, segundo os seus creadores, é un xeito de unir tres mundos que até o de
agora ficaban cun aquel de distancia: o montañismo, o trial e máis as redes da
información.
O obxectivo da proposta, concibida tendo moi en conta as tendencias actuais do
medio internauta (dinamismo, contidos xerados polo propio internauta, etc), é
servir de punto de encontro ós afeccionados a estes deportes e, en última
instancia, promovelos. A web inclúe apartados que son en si mesmos un reclamo
para participar nela de xeito activo, como a sección do concurso fotográfico ou
os foros e enquisas sobre trial e motociclismo.
Asemade, déixase unha ampla marxe para resolver as posibles consultas dos
internautas e para achegar datos sobre actividades, novas de interese e
ligazóns.