O catálogo social en liña patrimoniogalego.net acada xa as cinco mil entradas
martes, 28 de xaneiro do 2014
No
ano 2011 o profesor da USC e divulgador Manuel Gago expoñía a idea
da creación dunha mesa en defensa do patrimonio galego. É entón
cando bota a andar o maior rexistro público en liña dos monumentos
galegos -o catálogo social patrimoniogalego.net-
que arestora vén de facerse cun novo récord: os cinco mil bens
inventariados. O devandito catálogo ten como obxectivo
salvagardar a grande riqueza monumental herdada polos galegos (tendo
unha listaxe vermella onde se sinalan os bens que se atopan en peor
estado de conservación ou que corren perigo de desaparecer) e para
iso achega información
polo miúdo sobre milleiros de bens patrimoniais espallados ao longo
da nosa xeografía.
Amais
do nome, a tipoloxía, o estilo, a datación, a propiedade ou o nivel
de conservación dos obxectos catalogados, o portal tamén informa
sobre como chegar onda eles e mailo estado no que se atopan os
accesos.
Cómpre
informar que o mecanismo deste inventario social é moi semellante ao
da Wikipedia, ou sexa: calquera usuario pode converterse en
catalogador logo de rexistrarse. Emporiso, en patrimoniogalego.net unha
equipa de editores encárgase despois de revisar os datos
subministrados antes de procederen á súa publicación. Engadir que
nas fichas subidas polos catalogadores tamén se fai mención á
tradición oral asociada aos monumentos, coa finalidade de axudar a
conservar tamén as lendas ou cantigas relacionadas cos bens
inventariados. Doutra banda, este catálogo social constitúe xa un
arquivo fotográfico de primeira orde, posto que comeza a ser
empregado como o álbum de referencia á hora de consultar en liña a
imaxe dun determinado monumento en Galicia.
Dicir
que este site foi
concibido co soporte técnico de Wordpress e co aloxamento cedido por
Dinahosting, estamos perante un sistema de información xeográfica
(SIX) 100% independente, sen ánimo de lucro e aberto á
participación cidadá que se adica á catalogación dos bens galegos
de carácter inmoble.
O
proxecto funciona grazas ao esforzo desinteresado dun grupo de
profesionais de distintas disciplinas e, sobre todo, grazas á
colaboración dos numerosos catalogadores. Aqueles que estean
interesados en colaborar con este proxecto só teñen que poñerse en
contacto coa equipa da web a través das redes sociais ou do email:
patrimoniodegalicia@gmail.com.
O
corpo de editores que supervisan as fichas está formado por: Adela
Oyonarte, Franjo Padín, Carmela Sánchez Arines, Xosé Gago e máis
Elixio Vieites, mentres que Milagros Bará, Álex Bragaña e Soledad
Felloza conforman o corpo de produción. Das cuestións xurídicas
ocúpase o avogado Bernardo Dios, ao tempo que Eladio Rial e Manuel
Gago se encargan do deseño e do mantemento da páxina. Por último,
os xornalistas Xurxo Salgado e Félix Aragunde son os responsables da
comunicación.