O blog de Actitude Innovadora celebra as 100 entradas cunha nova proclama ao prol da I+D
luns, 1 de abril do 2013
A innovación non debe ser unha fórmula illada que
repercuta só nos demais: ten que ser unha fórmula aplicábel a
tempo completo no seo da nosa empresa. E non só a través de
iniciativas que dean froitos empresariais concretos, senón a través
do máis simple dos xestos, xestións ou accións de promoción e
comunicación. Esta podería ser (e de feito é) a filosofía que
transmite INNAC (Actitude Innovadora), unha iniciativa da Fundación
Española para a Ciencia e a Tecnoloxía (FECYT) que busca fomentar a
cultura da innovación na sociedade e que estes días está de
celebración por ter acadado o seu post número 100 no
blog de seu. Cousa salientábel, este punto fixo de información,
se temos en conta que a Rede non é mesma dunha xornada para outra.
A entrada número 100 sérvelle á FECYT para
recordarnos que no dito sitio temos ao alcance man unha chea de datos
interesantes no eido da cultura da innovación, tanto procedentes da
propia fundación como de axentes externos: eventos, premios á
innovación, entrevistas a innovadores, prácticas inspiradoras “e
moito máis”.
Como dixemos, Actitude Innovadora nace en 2011 para
afianzar a filosofía da creatividade ao servizo do desenvolvemento
empresarial e investigador. Ou sexa, a filosofía de adiantarnos ao
presente e mesmo ao futuro. Abrangue as distintas iniciativas que
FECYT desenvolve para o fomento da cultura da innovación. “Neste
contexto”, informa a fundación, “INNAC encamíñase
a impulsar a dita cultura para que a innovación
forme parte de todos nós, e todo o que aquela implica: o conxunto de valores, hábitos e actitudes que
promoven procesos de cambio baseados no coñecemento, cuxo resultado
xera valor económico e social”. Desde 2011, INNAC desenvolveu
e desenvolve proxectos propios co devandito obxectivo entre distintos
colectivos. Por exemplo, Retos da actitude innovadora (para
todos os cidadáns), Cidades con actitude innovadora (para os
concellos), As pequenas están a traballalo (para
micro-PEME) ou A Cadea da Innovación (para estudantes de
Formación Profesional). Ademais, desde FECYT xestiónase a
convocatoria de axudas para a cultura científica e a innovación,
desde a que se apoian moitas iniciativas que tamén perseguen o
fomento da actitude innovadora na sociedade. Polo que respecta aos
seguintes movementos a afrontar dende INNAC e o seu blog, o cometido
é ir aínda máis lonxe durante 2013, “pensando xa en vindeiros
proxectos para fortalecer a capacidade creativa e a innovación, que
son quen de transformar o mundo que coñecemos e con enerxía
para non deterse nunca”.