O alumnado do programa de doutoramento Doc_TIC expuxo as súas teses na UVigo
venres, 23 de xuño do 2017
Onte
o salón de graos da Escola
de Enxeñaría de Telecomunicación de Vigo inauguraba unhas xornadas
nas que o estudantado de doutoramento amosa o progreso dos seus
traballos perante as compañeiras e compañeiros e diante dun
comité externo que se encarga de avalialos. As ditas xornadas, que
pechan as súas portas hoxe, están promovidas polo programa de
doutoramento en Tecnoloxía da Información e as Comunicacións,
Doc_TIC, pola escola de Enxeñaría de Telecomunicación e AtlantTIC.
A dita iniciativa, pioneira na Universidade de Vigo, corre a cargo da
catedrática Carmen García Mateo e cumpre este ano a súa cuarta
edición.
A
este encontro acude un 50% de alumnado estranxeiro, procedente de
países de América do Sur e Portugal, amais de estudantando do Norte
de África e os Balcáns. “O perfil maioritario de ingreso é TIC e
no caso concreto do alumnado español a súa procedencia é Enxeñaría
de Telecomunicación”, explica García Mateo. A amplitude temática,
é para a súa responsábel, a principal fortaleza do programa “que
serve de paraugas para todos os grupos de investigación de
AtlantTIC”.
Cómpre
engadir que os corredores anexos da Escola de Enxeñaría de
Telecomunicación acollen tamén os pósters dos traballos
presentados polo alumnado do programa Doc_TIC. O director da Escola,
Íñigo Cuiñas e Carmen García Mateo, foron os encargados de dar a
benvida ao alumando, que comezaba deseguida coas presentacións
exprés (45 presenciais e 24 por Skype), apoiadas nunha diapositiva
dos seus traballos académicos. Asemade, este formato repetirase
hoxe, pois os catro comités avaliadores irán realizando ao longo do
día o seu traballo, segundo se vaian desenvolvendo as case 70
exposicións dos estudantes, que coñecerán as notas definitivas a
mediados do mes de xullo.
Alén
disto, as sesións ampliaranse con dous relatorios a cargo de
investigadores de centros estranxeiros de investigación coa vontade
de internacionalizar o programa, trátase de: Rafael F.S. Caldeirinha
(Instituto Politécnico de Leiría), quen ofreceu onte a primeira das
conferencias e Patrice Bellot (Universidade of Aix-Marseille-CNRS),
que intervirá hoxe.