O Zune chegará a España como unha tenda de contidos multimedia

Microsoft leva varios anos intentando facerse un espazo no mercado dos reprodutores multimedia nos EE.UU. co seu Zune, e aínda que esta familia de dispositivos continúa a estar inédita en Europa, no outono preparan o desembarco da súa plataforma de contidos a varios países europeos entre os que figura España.
A ausencia dos Zune HD (reprodutores de contrastada calidade) no mercado europeo non será un atranco para o Zune Marketplace, pois pode accederse a esta plataforma de contidos de pagamento a través do PC, da consola de videoxogos Xbox 360 e dos futuros móbiles co sistema operativo Windows Phone 7, que posiblemente cheguen simultaneamente coa nova tenda de descargas.
A nova plataforma permitirá a compra de cancións en formato MP3 a un prezo de entre 79 e 99 puntos por pista (entre 0,95 e 1,19 euros), o aluguer de vídeos (a compra dos mesmos non estará dispoñible para España) e incluso a subscrición musical mediante entreaming por 9,99 euros/mes contratando o chamado Zune Pass.