O Startup Congress Galicia 2022 celebrarse presencialmente en Vigo

O Startup Congress Galicia celebrarase os vindeiros días 31 de marzo e 1 de abril de 2022 en Vigo, en dúas intensas xornadas nas que o Consorcio Zona Franca de Vigo (Rúa do Areal, 46) acollerá a todas as aceleradoras galegas e a máis de 50 fondos de investimento nacional ao redor dun amplo programa de charlas e tres salas simultáneas con relatorios, keynotes, entrevistas, mesas de debate, pitches de investimento e entrega de premios aos tres mellores proxectos emprendedores.
Ademais, este ano realizaranse charlas sectoriais onde se debaterá entre actores de cada sector sobre o futuro de diversas áreas. O evento terá prazas limitadas para a asistencia presencial, pero poderá ser seguido por todos a través de diversas canles de streaming.
Estará presente Hugo Arévalo, de JobTalent e ThepowerMBA. Entrou en fase seed en Glovo, JobandTalent e Cabify, tres das catro primeiras empresas unicornio (compañías de capital privado −non cotizada− cuxa valoración superou os 1.000 millóns de dólares) de España.
Estará Luís del Pozo, CEO de Legalitas, enxeñeiro de telecomunicacións que foi directivo de Jazztel e está decidido a revolucionar o sector legal sostendo que «queremos ser o Netflix dos avogados».
Nas mesas O futuro de... debaterase sobre como será a industria, o retail, a banca, a saúde, a loxística, a enerxía, a open innovation e mesmo o deporte con representantes destacados destes ámbitos. Expoñerán en mesas de debate as súas visións sobre os cambios que se produciron e estanse producindo, ofrecéndonos as súas expectativas sobre que nos depara o futuro nestes sectores.
Durante a tarde do xoves 31 e a mañá do venres 1, as aceleradoras Viagalicia, BFAero, BFAuto, Celta Labs, Abanca Innova, BFFood, High Tech Auto e Connector Startp Accelerator presentan as súas mellores empresas aceleradas a un extenso grupo de investidores. Dispoñerán, así mesmo, de espazos particulares para expoñer as súas necesidades e interese para atopar capital e poder sacar adiante a súa idea.
A partir de medio día do venres, o Startup Congress Galicia acollerá a clásica LaconNetwork, que xorde en xaneiro de 2010 como unha concentración espontánea de emprendedores relacionados coas TIC. O que comezou coa desculpa dunha comida informal, que cada último venres de mes reunía a emprendedores que construíron o seu modelo de negocio sobre a Rede, foi crecendo e evolucionando nun evento con máis de 1.000 asistentes rexistrados. O modelo está baseado en que calquera pode organizar unha Lacon mensual na súa zona, baixo dúas premisas moi simples: cada un pagará o seu en modo fondo común e non se come sentado para propiciar o networking e a mobilidade dos asistentes. Desde o ano pasado, pasa a denominarse Startup Congress co obxectivo de chamar a atención de empresas e investidores no ecosistema emprendedor galego. É unha iniciativa da Asociación Galega de Emprendedores.