O SERGAS estrea unha aplicación móbil para guiar aos pacientes no interior dos centros hospitalarios
martes, 3 de xaneiro do 2017
O Servizo Galego de Saúde vén
de poñer en marcha SIGUE (Sistema Intelixente de Xeolocalización de Usuarios en
Edificios), un sistema pioneiro para a localización e guiado de pacientes
no interior de varios dos seus centros, de xeito que, a través dunha aplicación
móbil dispoñible de balde na App Store e en Google
Play, os pacientes poderán orientarse dentro do Hospital Lucus Augusti e do
Hospital Álvaro Cunqueiro do mesmo xeito que habitualmente se utiliza en
exteriores mediante o sistema GPS.
A aplicación permite ofrecer un servizo de localización no
interior de edificios onde non existe cobertura de GPS, contando cunha marxe de
erro inferior a 1 metro, o que en combinación coa consulta de citas programadas
no sistema público de saúde, tanto en hospitais como en centros de saúde,
convértese nunha ferramenta de grande utilidade.
Ademais, ao sistema téñenselle incorporado funcionalidades
como a asignación das quendas de consulta mediante a propia aplicación móbil,
unha vez que o paciente estea no centro (xunto co guiado ata a sala de espera
correspondente), sen necesidade de empregar os quioscos habilitados para isto
nin de acudir aos mostradores de cita.
Tamén inclúe a proposta de rutas no exterior ata o centro en
que está programada a cita médica; a suxestión de rutas internas ata o punto
público do hospital que se elixa; información sobre servizos non sanitarios do
edificio (cafetería, prensa, etc.) e da súa contorna; e a comunicación dunha
posición dentro do centro a outros usuarios da aplicación móbil que figuren
como contactos.
Para o funcionamento desta aplicación móbil tense creado un
sistema de cartografía de edificios para incorporar os mapas internos dos
centros nos que funciona o sistema de guiado. Así mesmo, permitirá utilizar
realidade aumentada para orientarse, tanto en exteriores como en interiores.
Nos vindeiros meses está previsto que o sistema se estenda
ao Hospital Comarcal de Verín, a unha vintena de centros de saúde
correspondentes á Estrutura Organizativa de Xestión Integrada de Ourense e ao
edificio administrativo da Consellería de Sanidade e do Sergas, en Santiago.