O Prime Day superou en vendas ao Black Friday en Amazon.es

Ao anunciar a celebración do terceiro Prime Day confiábase en que Amazon conseguise unhas vendas realmente impresionantes, xa que en citas anteriores conseguiran ser o segundo día de vendas por detrás do Black Friday, pero o pasado día 11 fixeron historia e dende Amazon.es confirman que os seus clientes Prime mercaron máis produtos que no pasado venres negro.
En boa medida é comprensible que o Prime Day teña unhas vendas tan boas porque é un día de ofertas exclusivo de Amazon, mentres que o Black Friday celébrase en numerosos establecementos, de xeito que as compras dos consumidores están máis repartidas, aínda que queda por ver se o venres negro do presente ano consegue superar o volume de vendas do pasado martes (pois tamén temos que recoñecer que o comercio electrónico continúa a medrar con forza, estando bastante lonxe do estancamento do seu crecemento).
O produto máis vendido durante o Prime Day foi o lector de libros electrónicos Kindle Paperwhite (que ofrecíase cun desconto de 40 euros), aínda que tamén tiveron unhas vendas moi importantes as tarxetas de memoria e unidades USB de SanDisk, os teléfonos Moto G5, os portátiles Lenovo Ideapad 310, os GPS para bicicleta Garmin Edge 1000 e os cueiros Dodot Sensitive.
As vendas por parte dos gamers tamén se fixeron notar con decenas de milleiros de videoxogos e consolas vendidas; a compra de fotografía superou un 76% a do ano pasado; os produtos de cociña estiveron preto de dobrar as vendas con respecto ao ano pasado; os clientes de Prime fixéronse con máis de 15.000 auriculares e 64.000 xoguetes; e tamén rexistráronse milleiros de monitores de actividade vendidos.
Durante as 30 horas que durou o Prime Day rexistráronse unhas vendas un 60% superiores ás do ano pasado, e tamén bateron record de novos subscritores do servizo Amazon Prime.