O Premio Nobel de Física Sir Anthony Leggett falará en Santiago do porqué de non podermos viaxar cara atrás no tempo

O Programa Conciencia, posto en marcha dende a Universidade e o Consorcio de Santiago para situar á capital galega no eixe da divulgación investigadora internacional, terá a vindeira semana un importante repunte de actividade. De feito, os seareiros galegos de todo o que teña que ver cos máis interesantes achados científicos, están sen dúbida de celebración, xa que Sir Anthony Leggett, Premio Nobel de Física, estará en Compostela convidado polo devandito programa. A actividade central da súa estadía será unha conferencia pública para falar do tempo e, sobre todo, da suposta imposibilidade de viaxar a través del cara atrás, por moi modernas e desenvolvidas que sexan as tecnoloxías que temos ao noso alcance.
A cita será no Auditorio Novagalicia Banco da rúa Preguntoiro, o xoves 7 de marzo a partir das 20.00 horas. A entrada é de balde e inclúe tradución simultánea.
Lembrar que Sir Anthony Leggett, investigador da Universidade de Illinois (Urbana-Champaign), foi Premio Nobel no ano 2003, polas súas "contribucións pioneiras á teoría dos supercondutores e superfluidos". Leggett destaca polo tanto polo estudo pormenorizado das propiedades dos materiais supercondutores (que transportan unha corrente eléctrica sen perdas) e superfluídos (fluídos carentes de viscosidade), sobre todo no que atinxe ao que está alén da nosa percepción visual: os fenómenos cuánticos na escala macroscópica dos que logo podemos ver as consecuencias. Estas propiedades e procesos teñen importancia pola súa aplicación na tecnoloxía e ciencia dos materiais, e tamén porque achegan a posibilidade de estudar as características cuánticas a simple vista. O profesor Leggett, informan os responsábeis do Programa Conciencia, proporcionou o marco teórico para a comprensión do fenómeno da superfluidez no Helio-3, un dos dous sistemas superfluídos coñecidos ata o momento. Tamén destacan as súas contribucións para a compresión das interaccións entre sistemas cuánticos e macroscópicos, ou dos condensados de Bose-Einstein.