O Plan Digitalent 2022 incorpora un programa para facilitar a empregabilidade dos estudantes de FP
xoves, 27 de outubro do 2022
A
Axencia
para a Modernización Tecnolóxica de Galicia (AMTEGA) informou dos
detalles do novo catálogo de actividades do Plan Digitalent, un
novo conxunto de accións destinadas a fomentar o talento tecnolóxico
das nosas mozas e mozos, a espertar vocacións e favorecer, en última
instancia, a súa empregabilidade (satisfacendo a demanda crecente de
novos perfís dixitais). Haberá, neste curso 2022-2023, propostas
para todas as idades. No capítulo de novidades inclúese a
iniciativa Mentoring FP.
O
catálogo para o novo curso escolar pechouse este xoves 27 cunha
xuntanza de traballo presidida por Julián Cerviño Iglesia, director
da AMTEGA, na que participaron as empresas do Pacto dixital que
colaboran co Plan.
As
propostas das empresas iranse incorporando á web
de Digitalent, á medida que se pechen datas e prazas de cada
unha.
O
director fixo balance da convocatoria do curso anterior, no que se
celebraron ata 37 actuacións dirixidas aos distintos perfís da
cidadanía, quixo agradecer ás empresas colaboradoras e ao Clúster
TIC “o seu labor e compromiso no fomento do talento dixital galego
nos últimos anos”.
Iniciativas
lideradas pola axencia
Entre
as liñas do Plan para o próximo período, avanzáronse as propostas
impulsadas pola AMTEGA, como a renovación do programa Tecnólog@
por un día, unha iniciativa liderada pola axencia autonómica
que acada xa as seis edicións celebradas dende 2018. O catálogo do
curso 2021/2022 acollerá dúas novas edicións desta actividade,
coas que se seguirán a impulsar as vocacións STEAM e o interese nas
novas profesións dixitais entre os rapaces e rapazas de Secundaria e
Bacharelato.
A
primeira quenda deste curso conta con máis de 50 prazas e terá
lugar durante os meses de novembro e decembro. O alumnado
participante poderá desfrutar dunha xornada inmersiva nos centros de
traballo das empresas TIC que colaboran co programa, Altia
Consultores, DXC Technology, NTT Data, Quobis, Satec ou Televés, ou
visitar as instalacións da Amtega no GaiásTech.
Doutra
banda e como novidade este ano, destaca a próxima posta en marcha do
programa Mentoring FP, unha iniciativa conxunta da Axencia e a
Consellería de Cultura e Educación, impulsada no marco da
Estratexia de Formación Profesional Galicia 2030 e da Estratexia
Galicia Dixital 2030. Trátase dunha actuación que ten por obxectivo
“facilitar a entrada no mercado laboral dos estudantes de Formación
Profesional dan man dos expertos e profesionais das empresas
colaboradoras, que titorizarán aos participantes a través dun Plan
de Mentoring personalizado, acompañándoos na identificación de
saídas profesionais adaptadas ao seu perfil ou asesorándoos na
posta en marcha dun proxecto emprendedor”.
Mentoring
FP acada xa as 30 prazas confirmadas por Altia Consultores, DXC
Technology, Inetum, NTT Data e SATEC, dirixidas ao alumnado de Grao
Superior e Cursos de Especialización de Formación Profesional da
familia de coñecemento Informática e Telecomunicacións.
Ademais,
a Xunta segue a poñer o foco na atracción e retención do talento
dixital galego e continúa a traballar en Retorna Dixital, un espazo
web que recolle as ofertas de emprego do sector TIC de Galicia,
ofrecendo aos galegos e galegas retornados ou que se atopan no
exterior oportunidades de desenvolver a súa carreira profesional na
nosa comunidade.
Con
esta actuación, a Axencia, en colaboración coa Secretaría Xeral de
Emigración no marco do programa Galicia Retorna, busca “xerar un
espazo de encontro en constante actualización entre o sector
tecnolóxico galego e os perfís dixitais especializados emigrados
para así reducir a fenda entre a demanda e a dispoñibilidade de
talento tecnolóxico en Galicia”.