O Pazo de Arenaza celebra a semana dos freelancers con xornadas de portas abertas e un evento este venres (3+1)
xoves, 19 de outubro do 2023
Con motivo da semana European
Freelancers Week o espazo de coworking do Pazo de Arenaza
(Oleiros, A Coruña) organiza o evento 3+1 aprendizaxes para
freelancers, no que tres relatoras especializadas achegarán
cadansúas experiencias e aprendizaxes sobre a contorna do traballo
autónomo e independente e o ámbito empresarial free. Trátase
de Tania
Prego Bravo, socia directora en Ártica Agencia Creativa, que
explicará a súa viaxe de freelancer á axencia; Leandro
Menéndez, podcaster en Babel Infinito e creador de
contidos en Mumbler, que amosará unha perspectiva empresarial da
creación de podcasts; e Ana
Belén Muñiz Vera, xestora de empresa e formadora, dará as
claves de cotizacións dos autónomos.
Durante o evento as persoas asistentes compartirán
un café de networking e terán ocasión de debater en
conxunto sobre a xestión do tempo como freelancer.
O evento celebrarase de forma presencial no
coworking do Pazo de Arenaza, Iñás, s/n, 15171 Oleiros, e será
retransmitido en liña.
As inscricións para calquera das dúas
modalidades deberán realizarse na web
do evento.
Open Coworking
Esta semana celébrase a European Freelancers
Week, que procura poñer en valor o tecido autónomo europeo con
eventos por todo o continente. Estas xornadas buscan crear conexións
e colaboracións, así como dar luz a problemas e posíbeis solucións
do sector dos autónomos. O Pazo de Arenaza en colaboración con AJE
Coruña, participará neste evento a través dun Open
Coworking ao longo de toda a semana e do evento 3+1
aprendizaxes para freelancers este 20 de outubro
O Open Coworking permitirá a calquera
persoa usar un módulo de traballo no Pazo de Arenaza do 16 ao 20 de
outubro. O único requisito para poder participar é inscribirse
na súa páxina web, xa que as prazas son limitadas.
O Pazo de Arenaza forma parte da Rede Provincial
de Espazos de Traballo da Deputación da Coruña e a través destas
iniciativas pretende xerar sinerxías entre o tecido empresarial da
contorna e das persoas emprendedoras que están a desenvolver os seus
proxectos neste centro, especializado en arquitectura, urbanismo e
empresas de base tecnolóxica.
Podemos ver máis datos sobre estas actividades na
web do Pazo de Arenaza.