O PPdeG reclama a liberación do espectro radioeléctrico para destinalo á mellora de Internet no rural
luns, 28 de decembro do 2009
Logo de que, a
comezos deste mes de decembro, o BNG presentara unha iniciativa no Congreso
para que Internet chegase aos concellos galegos pequenos a través da telefonía
4G e da tecnoloxía WIMAX, o PPdeG non quere ser menos pedindo conexión para a
nosa terra e tamén vén de instar á Xunta a que lle pida ao goberno español que “libere o espectro radioeléctrico para
destinalo á creación de redes de banda ancha no rural”.
Trátase dunha
proposición non de lei, presentada por Pablo Cobián, voceiro de Novas
Tecnoloxías que pretende, entre outras cousas, “que as empresas de telecomunicacións cumpran as súas obrigas e atendan
as necesidades reais de cobertura”.
A iniciativa considera, segundo
afiromou Cobián, que as compañías “deben
atender as necesidades reais de cobertura da cidadanía e non respondan só a criterios
meramente de beneficio empresarial".
Deste xeito, o texto inclúe a
obriga de que esas empresas repercutan parte dos seus beneficios implantando
infraestruturas no país.
Por outra banda, Cobián apunta que
esas firmas, sometidas ao control estatal, "destinan os seus recursos ás zonas urbanas, eludindo facilmente os seus
compromisos de cobertura no rural”.
A proposición solicita, asemade, que Galicia poida participar, na elaboración
dos pregos de cláusulas administrativas dos concursos así como na mesa de
adxudicación das concesións, o que permitirá, segundo palabras do voceiro do
PPdeG, "incrementar a competencia,
estimular a economía galega, xerar postos de traballo e facilitar que Galiza
dispoña de novas e mellores redes de telecomunicacións móbiles para o
desenvolvemento económico”.