O Obelisco acolle a partir deste xoves unha carpa informativa sobre Coruña Smart City
mércores, 10 de setembro do 2014
Seguimos dando conta de
novidades relacionadas con Coruña Smart City, a iniciativa do
Concello coruñés para converter a cidade galega nunha urbe
conectada. Se
onte falabamos dos vídeos achegados para informar das vantaxes que
terá para a veciñanza residir nun espazo urbano destas
características (aforros de tempo nas súas operacións diarias,
máis eAdministración, máis posibilidade de comunicárense en liña,
etc), agora os responsábeis da iniciativa queren dar un novo paso en
materia de promoción da mesma, e
fano instalando unha carpa no Obelisco dende o xoves 11 até o
domingo 14. Dende este punto de información faranse “percorridos
tecnolóxicos, interactivos e amenos” pola listaxe de beneficios
que pon en xogo Coruña Smart City.
Como dixemos, a carpa
estará situada no Obelisco desde o xoves 11 até o domingo 14, en
horario continuado desde as 10.30 até as 21.00 horas. Dentro da
mesma, engade ao Concello máis en detalle, “ofrecerase aos
cidadáns contido interactivo para que coñezan a transformación da
Coruña nunha cidade intelixente; cal é o estado e a dimensión do
proxecto Coruña Smart City e que vantaxes obterán os coruñeses ao
vivir nunha cidade intelixente”.
O interior da instalación
foi deseñado como “unha especie de museo”, incluíndo a presenza
de diferentes pantallas para amosar o proxecto desde cero e profundar
tamén en información “máis técnica e relevante”. Entre as
novidades que ofrecerá a carpa o Concello salienta a posibilidade de
ver A Coruña en 3D en tempo real grazas ao visualizador da
plataforma eVidens, un dos proxectos desenvolvidos ao abeiro de
Coruña Smart City. No visualizador os visitantes poderán obter
datos sobre mobilidade, medio ambiente, infraestruturas ou turismo,
entre outros moitos. Tamén se ofrecerá información sobre as áreas
nas que traballan os 14 pilotos (auga, educación, enerxía, medio
ambiente, mobilidade, lecer e turismo, servizos e vivenda), cales son
eses 14 proxectos pilotos “e como a tecnoloxía aplicada aos
servizos poderá mellorar a calidade de vida dos cidadáns”,
conclúen os responsábeis do proxecto.