O Ministerio de Economía concede o selo de empresa innovadora á galega Ipglobal
mércores, 6 de abril do 2016
O Goberno de España, a
través do Ministerio de Economía e Competitividade, vén de
conceder á empresa galega Ipglobal
o selo PEME Innovadora. Esta distinción, creada a finais do 2015,
recoñece a capacidade dunha compañía para a creación e
desenvolvemento de proxectos e produtos tecnolóxicos de vangarda así
como “a súa firme aposta en materia de innovación”. Como
lembraremos, Ipglobal é unha firma especializada no deseño e
lanzamento de produtos e solucións propias para negocios dixitais. A
día de hoxe, destina o 7% da súa facturación ao investimento en
Investigación, Desenvolvemento e Innovación (I+D+i). Este é, en
palabras dos responsábeis da firma emprazada na Coruña, “un dos
factores diferenciais de Ipglobal.
Segundo puidemos saber,
para a dita concesión (unha distinción que só se entrega ás
empresas estatais tecnoloxicamente máis avanzadas e con meirande
capacidade de evolución) o Ministerio tivo en conta parámetros
relacionados coa empregabilidade cualificada, a innovación, os
recoñecementos e os resultados das actividades levadas a cabo pola
firma galega no eido das novas tecnoloxías da información. A este
respecto, a empresa lembra que se tiveron en conta, especialmente, as
patentes da compañía (como Webphone, unha ferramenta click to
call que fusiona Internet e telecomunicacións) así como
produtos e modelos de negocio innovadores “que achegan un plus de
valor e competitividade ás marcas”.