O ITG, GAIN e a UDC esperan ter o Galaxy-Lab operativo a finais de ano
luns, 18 de abril do 2022
Este
mes de marzo que deixamos atrás puidemos coñecer unha chea de
detalles dun dos grandes proxectos da Cidade das TIC da Coruña: o
laboratorio avanzado de Intelixencia Artificial aplicada aos drons
Galaxy-Lab, impulsado polo Instituto Tecnolóxico de Galicia en
colaboración coa Axencia Galega de Innovación (GAIN) e a
Universidade da Coruña. Segundo fixo saber o
ITG na presentación, a iniciativa está chamada a situar a Galicia
“como referente europeo en probas con sistemas aéreos non
tripulados”. Prevese que estea operativo a finais deste ano,
dando servizo ás empresas que precisen probar os seus sistemas de
mobilidade aérea urbana para mercadorías ou para persoas.
Proporcionaralles unha contorna controlada e seguro para os seus
ensaios.
A
execución público-privada de Galaxy-Lab suporá un investimento de
1.159.700 euros, dos que a Xunta de Galicia achega 579.850.
Materializarase grazas á cesión dos terreos da Cidade das TIC
(antiga Fábrica de Armas da Coruña) por parte da UDC.
Segundo
se explicou na presentación, Galaxy-Lab constará por unha banda dun
edificio de máis de 1.000 m2 dotado dun centro de control de voos;
unha zona de voo indoor reconfigurable; un laboratorio
electrónico; espazos para montaxe, test e verificación; un taller
de mecanizado; áreas de impresión 3D e soldadura SMD e máis unha
zona de deseño e desenvolvemento con postos de traballo de oficina,
salas de reunións e almacén. Ademais, no exterior crearase unha
gran gaiola de 15m de altura e 225 m2 de superficie cunha rede de
seguridade que permitirá, segundo explicou o ITG, “realizar probas
de voo exterior con maior axilidade e total seguridade”. Xunto a
ela habilitarase un vertiporto para o despegue e aterraxe vertical de
drons. Este equipamento de vangarda complementarase cun centro de
operacións móbil nun vehículo adaptado que contará con sistemas
de comunicacións, navegación, vixilancia e control, sistemas que
permitan a operación remota de aparellos aéreos, unha estación de
recarga de enerxía específica para drons, unha estación
meteorolóxica de prestacións aeronáuticas e licenzas de servizos
O-Space.
O
ITG explicou que unha vez entre en funcionamento, Galaxy-Lab
permitirá o despregue de sistemas e servizos O-Space para probar en
voo aparellos “nun escenario urbano e suburbano realista”, onde
se poderán probar efectos como por exemplo a perda de sinal GPS en
espazos estreitos urbanos ou a perda de ligazón de comunicacións; o
axuste de sistemas de xeoposicionamento, navegación e comunicacións
(con presenza de edificios e outros obstáculos urbanos) ou a
coordinación co espazo aéreo controlado real, entre outras
situacións e escenarios.
Deste
xeito, “Galaxy-Lab resultará de especial interese para aqueles
operadores (empresas, centros tecnolóxicos ou universidades) que
precisen realizar ensaios cos seus produtos de I+D ou ben para casos
de uso previo a ser certificados ou operados de forma comercial”.
En particular, este laboratorio avanzado de ITG permitirá facer
ensaios temperáns, ou nas primeiras fases de desenvolvemento dun
produto de I+D, favorecendo a redución dos tempos de desenvolvemento
da I+D no ámbito dos UAVs