O INCIPIT culmina a súa instalación no Edificio Fontán
luns, 2 de maio do 2022
O
Instituto de Ciencias do Patrimonio (INCIPIT), do Consello Superior
de Investigacións Científicas (CSIC), culminou finalmente a súa
instalación no Edificio Fontán da Cidade da Cultura. Nun comunicado
sobre esta nova sede, o INCIPIT salienta o feito de contar con 2.400
metros cadrados postos a disposición do CSIC por parte da Xunta en
virtude dun convenio que establece un aporte do CSIC de 2,4 millóns
de euros polo uso deste espazo. Tamén destaca o feito que contará
cun persoal estábel dunhas 55 persoas de diferentes perfís
profesionais, ademais dunha nutrida nómina de colaboradores e
asociados.
“Disporemos
agora nesta sede con máis de 1.000 metros cadrados destinados a
albergar infraestruturas científico-técnicas de nova planta, entre
as que se contan laboratorios de arqueometría do patrimonio,
tecnoloxías xeoespaciais, etnografía experimental, ciencia cidadá,
un arqueoplanetario e cognición e materialidade. A sede está
concibida para albergar con comodidade o traballo dun persoal total
entre 90 e 110 persoas”, destaca Felipe Criado Boado, director do
INCIPIT, engadindo que “a nova sede achega uns valores estéticos e
funcionais que de seguro fomentarán o noso desenvolvemento”.
En
total, o Fontán dispón de case 14.000 metros cadrados e alberga,
ademais da sede do INCIPIT, a da Axencia para a Calidade do Sistema
Universitario de Galicia e o Consorcio Interuniversitario do Sistema
Universitario de Galicia. Acollerá tamén o Centro de Investigación
Interuniversitario de Paisaxes Atlánticas Culturais. Conta, ademais,
cun auditorio de 750 prazas e espazos para organización de eventos e
congresos. O edificio Fontán foi promovido pola Consellería de
Cultura, Educación e Universidade da Xunta de Galicia xunto á
Fundación Cidade da Cultura de Galicia. Foi deseñado polo
arquitecto Andrés Perea en colaboración con Elena Suárez e Rafael
Torrelo, aproveitando unha estrutura preexistente, o que abaratou a
súa construción.
O
INCIPIT reúne a especialistas de numerosos eidos da investigación,
como antropoloxía, arqueoloxía, arquitectura, astrofísica,
educación, filosofía, xeografía, historia, enxeñaría de
software, ou lingüística. Ademais de en Galicia e España, o
instituto desenvolve proxectos en moitos outros países, sobre todo
de América do Sur e África Subsahariana.
Como
instituto do CSIC, o INCIPIT non só realiza investigación, senón
que tamén leva a cabo accións de formación, divulgación, e
prestación de servizos especializados. Na actualidade, desenvolven o
seu labor no seu seo unhas 60 persoas con diferentes perfís
profesionais. O INCIPIT está a executar máis dunha vintena de
proxectos de investigación financiados en convocatorias de
concorrencia competitiva, entre os que destacan dous grants do
European Research Council.