O Hub Audiovisual da Industria Cultural inclúe unha aposta firme polos videoxogos
venres, 10 de setembro do 2021
- O conselleiro Román Rodríguez nunha presentación celebrada recentemente
O
sector dos videoxogos vai ter unha importante achega de enerxía
extra na nosa terra, principalmente no ámbito das novas iniciativas
de mercado postas en marcha por xente emprendedora. Este
impulso vaise materializar a través do Hub Audiovisual da Industria
Cultural, posto en marcha oficialmente este 10 de setembro.
No
arrinque da súa actividade, o conselleiro de Cultura, Román
Rodríguez, fixo saber ante o sector (as asociacións e as empresas
audiovisuais galegas) que a iniciativa mobilizará unha inxección
total de 9,6 millóns de euros até 2023 (a través do fondo FEDER e
o eixo React-UE). De inicio suporá unha contía de 2 millóns.
En
palabras do conselleiro, esta achega inicial supón o arranque dun
“programa de apoio sen precedentes para acelerar a recuperación e
garantir a estabilidade dos profesionais do sector”.
Segundo
engadiu, a posta en marcha da Galicia Film Comission, as subvencións
para o desenvolvemento de grupos de proxectos, o polo de talento do
sector audiovisual, o plan creativo e empresarial para videoxogos e
un fondo transversal para o conxunto da industria cultural son
algunhas das principais iniciativas que serán desenvolvidas
proximamente ao abeiro do Hub.
Plan
para os videoxogos
No
caso do Plan de desenvolvemento creativo e empresarial dos
videoxogos, a Xunta busca “dar resposta ao potencial do sector en
Galicia” e “á necesidade de vertebrar este talento en diferentes
áreas de actividade, apoiando tanto a guionización, produción e
comercialización de videoxogos, como o desenvolvemento de software,
especialmente no eido dos motores e micro-pagos”.
Ademais,
o Hub Audiovisual suporá a creación da Galicia Film Comission, un
proxecto que viña sendo demandado polo sector e que se materializará
na activación dunha plataforma web con distintas utilidades, tanto
para obter unha ampla información sobre a produción e rodaxe de
obras audiovisuais en Galicia como para a realizacións de xestións
en liña.
Amais,
os profesionais emerxentes poderán coller impulso cun Polo de
Talento do Sector Audiovisual, a través do que será artellado un
paquete de medidas centradas especialmente en áreas como a creación,
a guionización ou a dixitalización, co “obxectivo de mellorar as
súas competencias técnicas e de promover novos enfoques na xestión
e desenvolvemento das súas carreiras”.
O
Hub Audiovisual da Industria Cultural contará, así mesmo, cun fondo
transversal para o conxunto da industria cultural encamiñado a
equipamentos e promoción de proxectos I+D+i.