O Goberno salienta que España está a cabeza de Europa en rede de fibra até o fogar
luns, 5 de setembro do 2016
España, segundo o
Goberno, xa
ten hoxe en día a rede de fibra até o fogar máis extensa de
Europa. Este dato foi achegado hoxe durante a inauguración do
30º Encontro de Telecomunicacións e Economía Dixital (Universidade
Internacional Menéndez Pelayo de Santander) polo secretario de
Estado de Telecomunicacións e para a Sociedade da Información,
Víctor Calvo-Sotelo, quen engadiu que a devandita rede, “a de
meirande envergadura de Europa”, conta arestora con 22,5 millóns
de accesos instalados (fronte “aos 15,3 millóns de hai un ano e
1,6 millóns de 2012”, matizou).
O secretario de Estado
comezou a súa intervención destacando “o intenso traballo
realizado durante estes anos” e sinalou que “a transformación
dixital do noso país avanza a bo ritmo”. Ao fío disto, lembrou “a
cuarta posición que ocupa España segundo o DESI, un indicador
utilizado pola Comisión Europea para medir a Dixitalización da
Economía e Sociedade dos estados membros”. E engadiu: “España
foi o cuarto país que máis medrou no último ano”.
Nun plano máis concreto,
dixo que “o 13,8% das conexións a Internet en España son xa de
máis de 100 Mbps e a penetración de banda larga móbil do 80%”.