O Goberno avala a transformación de Ourense no primeiro destino turístico smart do eido estatal
venres, 10 de xuño do 2016
O
Goberno central vén de darlle un importante impulso ao proxecto de
Destino Turístico Intelixente da Deputación de Ourense. En
termos máis concretos, o Executivo confirmou o potencial da
provincia galega para ser a primeira provincia smart do
conxunto do Estado. Deuno a coñecer onte Antonio López de Ávila,
presidente da Sociedade Estatal para a Xestión da Innovación e as
Tecnoloxías Turísticas (SEGITTUR), pertencente ao Ministerio de
Industria, na celebración da xornada Destinos Turísticos
Intelixentes, comercialización e experiencias Spain.info,
que se desenvolveu no balneario de Laias (Cenlle), coa presenza do
presidente da Deputación de Ourense, Manuel Baltar, e de medio cento
de profesionais da cultura e o turismo de toda a provincia.
No marco desta reunión, López de Ávila salientou
o labor que está a desenvolver a Deputación de Ourense “coa posta
en marcha de iniciativas innovadoras aplicadas á xestión turística,
sinaladamente no ámbito do termalismo social e deportivo, que se
traducen en promoción e competitividade para a provincia de
Ourense”. Neste senso, o presidente de SEGITTUR certificou a
capacidade deste territorio galego para ser “a primeira provincia
co distintivo Destino Turístico Intelixente”. Tamén dixo,
valorando as posibilidades que se abren con esta acreditación, que
ser destino smart supón “aplicar os últimos avances
tecnolóxicos na xestión, xeo-localización e posicionamento
turístico na procura de novos mecanismos para impulsar a innovación
nos destinos co desenvolvemento das novas tecnoloxías, para crear
servizos diferenciais e competitivos con base na tecnoloxía aplicada
ao turismo”.
Baltar, pola súa banda, expresou a súa confianza
en acadar os pulos orzamentarios precisos, principalmente a través
de financiamento europeo, e máis tendo en conta que “a iniciativa
xa ten espertado o interese doutros territorios dentro e fóra de
España, tratándose como se trata dun proxecto no que a Deputación
actúa como eixe vertebrador de todos os concellos á hora de prestar
servizos aos cidadáns".
Na xornada, organizada polo INORDE, desenvolvéronse
dous relatorios, un a cargo de Antonio López de Ávila, quen falou
da aposta de futuro que supoñen os Destinos Turísticos
Intelixentes, e Patricia Zapardiel, directora de Proxectos de
SEGITTUR, quen ofreceu claves de impulso e asesoramento para a
creación e comercialización de experiencias turísticas a través
do portal oficial de turismo de España www.spain.info.