O Foro Tecnolóxico de Emprego da UVigo celebrará os seus 20 anos cunha manchea de novidades
venres, 28 de febreiro do 2020
O
Foro
Tecnolóxico de Emprego da Universidade de Vigo celebra este mes de
marzo, cunha nova edición, os seus vinte anos de andaina. Todo
promete que será unha convocatoria especialmente relevante, non só
polo feito de cumprir dúas décadas de actividade, senón tamén
polas cifras de participación acadadas nestas semanas previas ao
desenvolvemento do foro: xa confirmaron a súa presenza 40 empresas
con actividade na nosa terra. O encontro empresarial-estudantil
abrirá as súas portas o 4 de marzo, manténdoas abertas até o día
6. Celebrarase nas tres escolas de enxeñaría do Campus de Vigo. O
obxectivo, unha vez máis, é despexar de calquera obstáculo de
comunicación o espazo comprendido entre as empresas contratantes e o
alumnado contratábel.
O
foro estará coordinado pola estudante da Escola de Enxeñaría de
Telecomunicación, Carmela Janeiro, e organizado polo alumnado das
ditas tres escolas. En palabras de Janeiro, trátase “dunha boa
oportunidade para que o alumnado se relacione con diferentes empresas
do sector, entregue currículos e se familiarice cos mellores xeitos
de afrontar unha entrevista de traballo”. Precisamente, entre as
novidades deste ano figura un obradoiro sobre encarar unha entrevista
laboral e outras actividades con información variada sobre os
distintos procesos de selección das empresas.
Entre
as empresas e entidades que confirmaron a súa asistencia atópase un
bo feixe de firmas tecnolóxicas e innovadoras da nosa terra ou con
presenza na nosa terra. O grupo está constituído, entre outras, por
Optare, Deloitte, Brainport, Cortizo, os diferentes colexios
profesionais, Indra, Televés, R, Altia, Pescanova ou FINSA, ás que
se suman novas incorporacións como o grupo Oesía, GBTec, EGATEL ou
PWC. Ademais, no que se refire aos patrocinadores, este ano hai que
engadir a Frutas Nieves e Redivivus.
En
canto aos currículos, tras os datos recollidos das diferentes
empresas participantes estimouse que o pasado ano recolléronse ao
redor de 1.500. Nesta edición, a novidade de poder facer entrega do
currículo en liña puido levarse a cabo grazas a un sistema “moi
áxil e sinxelo co cal o alumnado poderá enviarlle o currículo ás
empresas de forma inmediata”, en palabras de Carmela Janeiro, que
lembra que, malia todo, a opción de facer entrega dos CV en papel
segue a estar vixente.
Segundo
as enquisas realizadas a participantes doutras edicións, Candela
Janeiro afirma que “un terzo do alumnado que participa no foro
atopa traballo e un 40% recoñece ter orientado os seus estudos
grazas ás recomendacións das empresas”.